Президенттің өзі де 2022 жылы Ұлттық арнаның тілшісі Жайна Сламбекке берген сұхбатында баспасөзді жібермей қарайтынын айтқан болатын.
«Бұл – менің бұрыннан қалыптасқан дағдым. Жалпы, мен көп оқитын адаммын. Жақсы мақала немесе сұхбат көрсем, астын сызып оқуға тырысамын. Өзекті мәселе байқасам, оған қатысты нақты тапсырма беремін», – деген еді сол сұхбатында Қасым-Жомарт Тоқаев.
Президент Aiqyn-да жарияланған мақалаларға орай бірнеше мәрте тапсырма бергені бар.
Осыдан бес жыл бұрын 2019 жылдың 30 шілдесінде кезекті нөмірге «Елімізде етікші тапшы» деген тақырыппен сұхбат жарияланды. Газет тілшісі Майра Жанысбайға берген сұхбатында Shoes Republic аяқкиім фабрикасының басшысы Дәурен Рахманқұл етік тігетін маман азайып кеткенін айтып, жиһаз, киім фабрикаларында жұмыс істеп жүрген тігіншілерді шақырып, оқытып, үйретіп жатқандарын жеткізген. «Орта арнаулы оқу орындары, колледждер етік тігетін шеберлер дайындамайды. Аяқкиім тігудің қыр-сырын білетін технологтарды қазір оқытпайды. Сондықтан бұл мәселені шешу үшін тігіншілерді қайта даярлап, етікші етіп шығарамыз», – деген еді ол.
Осы материал жарияланған соң екі күн өткенде (1.08.2019) Президент Қ.Тоқаев Twitter-де газетте жарық көрген сұхбатты оқып, отандық өнімді сатып алғанын жазды.
«Айқын» қарапайым еңбек адамдарын үнемі насихаттайды. Жақында етік тігетін жас кәсіпкер туралы жақсы сұхбат жарияланды. Отандық өнімді қолдау мақсатында мен де бір аяқкиімін сатып алдым. Адал еңбек етіп, нақты кәсіппен айналысуға деген көзқарас орнығуы тиіс», – деп жазды Қасым-Жомарт Тоқаев.
Мемлекет басшысының Aiqyn-да шыққан мақалаға үн қатуы бір бұл емес. 2021 жылғы 22 қыркүйектегі нөмірде «Қалжырды кім ластап жатыр?» деген проблемалық материал жарияланды. Мақала авторы газетіміздің Шығыс Қазақстан облысындағы меншікті тілшісі Азамат Қасым өңірдегі Қалжыр өзенінің жай-күйін жазып, судағы зиянды заттар мөлшері 17 есеге артқанын айтып дабыл қақты. «Қазір өзенде су емес, май аралас лай батпақ ағып жатыр. Қалжырдың Ертіске барып құятынын ескерсек, төменде суын ішіп, малын суарып отырған халық пен өзенді мекендеген балықтың жағдайы не болады? Бүгінде Ертіс пен Қалжырда шортан, көксеркені қойып, майшабақ та табылмайды. Әншейінде жағажайда біреу машинасын жуа қалса, қармақпен балық ауласа, жетіп келетін полиция, экологтер қайда қарап отыр?», – деп мәселе көтерген болатын тілшіміз.
Аталған мақалада «Хван С.А.», «Кошкинбаев Б.А.», «Бошаев У.Т.», «Дуйсембаев а.у.», «Мадымаров Х.Д.» жеке кәсіпкерліктері заңсыз қазған карьер мен Қалжыр өзенінің табиғи арнасын қалпына келтіру жұмыстарын жүргізіп жатқандықтан, су лайланғаны жазылды. Жергілікті тұрғындардың шуынан кейін облыстық Экология департаменті мамандары рейдтік тексеріс жүргізгенімен алпауыт бизнесмендер алдында дәрменсіздік танытқан.
Aiqyn газетінде жарияланған осы мақалаға байланысты Мемлекет басшысы Қасым-Жомарт Тоқаев Экология, геология және табиғи ресурстар министрлігі мен Шығыс Қазақстан облысының әкімдігіне аталған проблеманы егжей-тегжейлі тексеріп, кінәлілерді жауапкершілікке тарту туралы тапсырма берді. Президент пәрменінен кейін арнайы комиссия құрылып, Күршім ауданындағы Қалжыр және Күршім өзендерінің бойында жұмыс істеп жатқан кен өндіруші мекемелерді бір емес, бірнеше мәрте тексерген болатын.
Айта кетейік, бұл оқиға қоғамда қызу талқыға түсіп, әлеуметтік желіде де біраз жазылды. Мәжіліс депутаттары Ерлан Саиров пен Мақсат Толықбай да Facebook парақшаларында видео жариялап, үн қосты.
Осы кейстер Мемлекет басшысының қоғамдағы өзекті мәселелерге ықтиятпен қарайтынын көрсетеді. Қоғам тынысын сезінуде баспасөздің рөлінің ерекше екенін осыдан-ақ байқаймыз. Ал Президенттің басылымда жарық көрген мақалаларға тікелей үн қатып, бастама көтергені газет ұжымының мерейін тасытып, тілшілердің шабытына қанат бітіргендей болды. Газет мерейтойы кезінде мұндай естеліктер ойға оралады екен. Еңбектің бағаланғанына сүйінесің.
Ұлағат БЕКБОЛАТ