Түркістан облысында кеше теміржол көпірінің қоршауы опырылып түскен еді. Соған байланысты "Қазақстан темір жолы" ұлттық компаниясына айыппұл салынды, – деп хабарлайды Aikyn.kz 24kz-ке сілтеме жасап.
Құлаған теміржол өткелі Шымкент пен Сайрам ауданын байланыстырады. Өткел астынан көлік көп өтеді. Пойыз жақындаған кезде барлығы оның өтіп кетуін күтіп, содан кейін ғана қозғалысын жалғастырады. Кеше көпір көлік өтетін жолға құлады. Бұл нысанға "Қазақстан темір жолы" компаниясы жауапты. Компания өкілдерінің мәліметінше, апатқа қоршауға бекітілген металл баннер себеп болған.
Ал қазір мамандардың айтуынша, пойыз бен көлікке қауіп төніп тұрған жоқ.
– Апаттан 20 минуттан кейін келген бригада автожолдың жүріс бөлігін тазартты. Қазіргі уақытта құрылымның жиектерін ұлғайту жұмыстары жүргізіліп жатыр. Бұл теміржол жолына әсер еткен жоқ, сондықтан пойыз қозғалысының қауіпсіздігіне қауіп жоқ, – деп түсіндірді "ҚТЖ" ҰК" филиалы департаментінің бас менеджері Назар Шамшиденов.
Дегенмен жолдың бұл бөлігіне көлік жүргізушілері ұзақ уақыттан бері шағымданып жүрген, өйткені жол өте тар. Ал әкімдік оны үш жыл бұрын кеңейтуді жоспарлаған.
– Бұл жолда қозғалыс қарқыны өте көп, сондықтан кейде қыста кептеліс болады. Жобалық-сметалық құжаттама дайын болғаннан кейін, болашақта біз онда екі жақты туннель салғымыз келеді, – деп түсіндірді Сайрам ауданының жолаушылар көлігі және автожолдар бөлімінің басшысы Баймұрза Бейсембаев.
Түркістан облысының полициясы әкімшілік іс қозғалғанын хабарлады. Компания айыппұл төлеуі керек. Анықталған кемшіліктерді бір апта ішінде жою туралы қосымша нұсқама жіберілді. Әйтпесе, іс материалдары сотқа жіберіледі.