Қалалық Тілдерді дамыту басқармасы басшысының орынбасары Исабек Досжан кеш иесін құттықтап, Астана қаласының әкімі Жеңіс Қасымбектің Алғысхатын тапсырып, қазақтың дәстүрі бойынша иығына шапан жапты. «Бүгінгі кездесуді өткізудің мақсаты – еліміздің мәдени-әдеби өміріне елеулі еңбек сіңірген, соның ішінде елорданың рухани дамуына белсене атсалысып, сүбелі үлесін қосқан Есенгелді Сүйіновтің есімін дәріптеп, құрмет көрсету, сөз зергері, көрнекті ақын, қоғам қайраткері ретінде танылған бетке ұстар азаматтың шығармашылығын халық арасында кеңірек насихаттап, жан-жақты таныстыру. Қарымды қаламгер оқырмандарын алдағы уақытта да тәрбиелік мәні зор тартымды шығармаларымен қуанта береді деп ойлаймын», – деді Исабек Досжан.
Қазақстанның еңбек сіңірген қайраткері Ораз Қауғабай Есенгелді Сүйіновтің шығармашылығына қатысты жылы лебізін білдірді. Халықаралық «Алаш» сыйлығының лауреаты Өріс Яшүкірқызы «Мен Есенгелдіні жас кезінен білемін. Сол кезден бастап, балауса өлеңдер жазған алғыр жігіт қолынан қаламын әлі тастаған жоқ. Оның жалынды жырлары жұртымызды мейірімділікке, инабаттылыққа, адамгершілікке, қайырымдылыққа, Отанымызды сүюге тәрбиелейді», – деп атап көрсетті.
Көкшетау қаласынан келген облыстық Әдебиет және өнер музейінің директоры Нұрбек Нұралин Ақмола облысының әкімі Марат Ахметжановтың құттықтаухатын оқып, Оқжетпестің, Бурабайдың жазғы келбеті бейнеленген картинаны сыйласа, Мәлік Ғабдуллин музейінің директоры, әнші Кенжебай Мұқышев домбырамен ән шырқап, тыңдаушылардың қошаметіне бөленді.
– Есенгелді Сүйіновтің өлеңдерін зер салып оқып жүремін. Ақынның туған жер, оның әсем табиғаты жайлы, танымал қайраткерлерге арнаған сыршыл өлеңдері ешкімді бей-жай қалдырмайды. Оның шығармашылығынан үнемі ізденіс, көркемдік жағынан өсу, тіл байлығы байқалады, – деді «Дарын» мемлекеттік жастар сыйлығының, ұлттық «Айбоз» сыйлығының лауреаты, драматург Айгүл Кемелбаева.
Қазақстан Жазушылар одағы басқармасының хатшысы, «Дарын» мемлекеттік сыйлығының лауреаты, Қазақстанның еңбек сіңірген қайраткері Дәулеткерей Кәпұлы Қазақстан Жазушылар одағы басқармасының төрағасы Мереке Құлкеновтың құттықтауын оқып, ақынға шығармашылық табыс тіледі.
«Жайнай бер, туған елім!» шығармашылық кешінде Әзербайжан Мәмбетов атындағы мемлекеттік драма және сатира театрының әртістері Есенгелді Сүйіновтің Отан, туған ел, табиғаттың әсем көріністері, мөлдір махаббат, сүйіспеншілік, сондай-ақ тарихи тұлғалар тақырыбына арналған албырт сезімге, тегеуірінді жігерге толы әсерлі өлеңдерін жатқа оқыды. Ақын өлеңдерінің сөздеріне жазылған «Өзіңді күтіп жүрмін», «Сағындым ғой мен сені» әсем әндерін Қазақстан Республикасының еңбек сіңірген қайраткері Арайлым Рахымқызы, халықаралық конкурстардың лауреаты Дос секілді танымал әншілер орындады. Ақын Марфуға Бектемірова өлеңдерінің сөзіне жазылған «Ақ қайыңға» әнін Қазақстанның еңбек сіңірген қайраткері Клара Төленбаева, «Аққуым менің қайдасың?» әнін талантты композитор, әнші Медет Салықов шырқап, жұртшылықты өнерлерімен тәнті етті.
Қорытынды сөз кеш иесіне берілді. Ақын Есенгелді Сүйінов жаңа өлеңдерін оқып, мұндай кештің халықтың поэзия әлеміне сапар шегіп, одан ләззат алуына, өмірге оң көзқараспен қарауына әсер ететінін айтты, алдағы шығармашылық жоспарларын ортаға салды.
Берік БЕК