«AMANAT» партиясының «Жастар Рухы» жастар қанаты Қазақстанның тарихи, мәдени және табиғи мұрасын вандализмнен қорғау жөніндегі ауқымды республикалық акцияны жалғастыруда.
Мемлекет басшысы Қасым-Жомарт Тоқаев өзінің «Әділетті Қазақстанның экономикалық бағдары» Жолдауында заңды қатаң сақтауды, қоғамдық тәртіпті қамтамасыз етуді тапсырғаны белгілі. Президент даладағы, көшедегі вандализм, кейбір азаматтарымыздың тәртіпсіздігі, мәдениетсіздігі, түрлі тұрмыстық жанжал еліміздің халықаралық аренадағы абыройына нұқсан келтіретініне назар аударды.
Мәселені шешу үшін жастар қанатының белсенділері мен жақтастары өткен жылы тарихи ескерткіштерді, табиғи саябақтар мен қасиетті орындарды бұзақылық пен вандализмнің ізінен тазартуға кірісті. Мысалы, «Жастар Рухының» 50-ден астам белсендісі «Жұмбақтас» жартасын тазалап, «Бурабай» мемлекеттік ұлттық табиғи паркінің аумағында сенбілік өткізді. Сонымен қатар жастар қанатының мүшелері Алматы облысындағы Іле өзенінің бойында орналасқан «Тамғалы тас» шатқалынан 100 қап қоқыс шығарды. Қостанай облысы Мичуринское ауылында «Жастар Рухы» белсенділері Ыбырай Алтынсарин кесенесінің аумағында сенбілік ұйымдастырды. Мұндай іс-шаралар елдің өзге өңірлерінде де өтеді.
Барлығы 1 500-ден астам «Жастар Рухы» белсенділері мен еріктілері 500-ден аса табиғи, тарихи және мәдени ескерткішті тазартты.
Акцияға қоғам белсенділері де қосылды. Мәселен, Kaz Alpine Сlub бірлестігінің басшысы Денис Лукьянчук өткен жылдың 13 қарашасында ұлттық мұраны қорғау жөнінде петиция бастады. Атап айтқанда, автор вандализмге қарсы бірқатар шараны ұсынады: ескерткіштерді бүлдіргені үшін жазаны қатаңдату, айыппұлдарды көбейту және елді мекендерден алыс орналасқан қасиетті нысандарды күзету үшін көшпелі патрульдер ұйымдастыру және өзге де жобалар енгізіліп отыр.
Жарты жылға жетпей бұл бастаманы 16 мыңнан астам адам қолдады. «Жастар Рухы» жастар қанатының мүшелері барлық қазақстандықты өзекті мәселеден тыс қалмауға және петицияға қол қоюға шақырады.
Петицияға қол қою үшін alash.online порталына кіріңіздер.