«AMANAT» партиясының бастамасымен және Түркістан облысы әкімдігінің қолдауымен өткен дәстүрлі өнер додасын Айтыс ақындары мен жыршы-термешілердің халықаралық одағы, «AMANAT» партиясы Түркістан облыстық филиалы, Түркістан облысының Мәдениет және туризм басқармасы бірлесіп ұйымдастырды.
Өнер сайысын елімізге белгілі айтыскер ақын, Қазақстан Республикасы Парламент Мәжілісінің депутаты, «AMANAT» партиясы фракциясының мүшесі Аманжол Дүйсенбайұлы Әлтай ашып, Түркістан жұртшылығын жыл басы мерекесімен құттықтады. Көктем Түркістаннан бастауын алатынын айта отырып, рухани төріміздің тарихи және мәдени орнын айрықша айшықтады. «Ата тарихымыздың алтын тамыры Түркістан төріне бес өнердің басын қосып, қазақ өнерін жәрменкесін өткізуге келіп отырмыз», – деді.
Қос өңірдің дүлдүлдеріне ақеділ пейілін Түркістан облысының әкімі Дархан Амангелдіұлы жеткізіп, рухани астанамыздан бастау алатын Наурыз думанды ежелден еншілес болып қоныс тепкен өңірлердің айтыс дәстүрімен жалғастыруды ұсынғанын айтты.
Жыршылар сайысы бойынша бақ сынаған Аязбек Рүстемов пен Бекарыс Қошбаевқа, күй тартыс көрсеткен Жандос Құлымбетов пен Дидар Басықараевқа, дәстүрлі ән орындаушылық шеберлігі бойынша Мағжан Әлденбаев пен Мерей Әбуеваға, терме орындау бойынша Руслан Ақынбеков пен Маралбек Бабақұлға әрқайсысына 250 мың теңгенің сыйлығы тағайындалды.
Қазылар алқасының шешімімен сәл басымдықпен Түркістан облысының жыр дүлдүлдері командалық айтыстың келесі айналымына жолдама алды. Жеңімпаз командаға келесі айналымға жолдама сертификатын Түркістан облысы әкімінің орынбасары Бейсенбай Тәжібаев табыстады. «AMANAT» партиясы Түркістан облыстық филиалының төрағасы Алтынсары Үмбетәлиев Жамбыл облысы ақындарының өнеріне алғысын білдіре отырып, Түркістанның қасиетіне баланған Тайқазан естелік сыйлығын тарту етті.
Партия бастамашыл болған республика өңірлері арасындағы топтық сайыстың бірінші кезеңі 20 команданың қатысуымен өтіп, олардың қорытындысымен үздік 10 команда анықталады. Екінші кезеңде 10 команданың ішінен 4 мықты команда үшінші кезеңге жолдама алады. Үшінші кезеңде анықталған 2 команда 2025 жылы Астана қаласында өтетін ақтық сайысқа қатысады. Байқау шарты бойынша айтысқа әр командадан төрт айтыс ақыны, бір термеші, бір жыршы, бір дәстүрлі әнші, бір күйші қатысады.
Назгүл НАЗАРБЕК,
Түркістан облысы