Барлық аймақта Наурыз мерекесін тойлаудың онкүндік жоспары бекітілгені белгілі. Осы іс-шара жоспары аясында Сыр өңірінде де ауқымды шаралар өткізілді.
Атап айтқанда, 14 наурыздан бастау алған ұлық мерекеде 2 300 отбасыға қайырымдылық көрсетілді. Тұрғын үй кезегінде тұрған 215 отбасы қоныс тойын тойлады. Осы онкүндікте ұмыт бола бастаған асыл құндылықтарымыз қайта жаңғырып, халық ұлттық нақышта киініп, жаңару мен жасампаздықтың жарқын үлгісін паш етті.
Бұл жылдың тағы бір ерекше жаңалығы – Байқоңыр қаласында да әз-Наурыз мерекесі жоғары деңгейде тойлана бастады. Ресейдің меншігіндегі жұлдызды қалашықта қазақ халқының салт-дәстүрі мен әдеп-ғұрпы дәріптеліп, ұмыт бола бастаған ұлттық құндылықтарымыз кеңінен насихатталуда.
«Биыл Наурыз мерекесі Байқоңырда ерекше нақышта тойлана бастады. Арнайы бекітілген іс-шара жоспары аясында 14 наурыздан басталған мерекелік шара қала халқына ерекше көңіл күй сыйлады. Атап айтқанда, «Көрісу күні – Амал мерекесі» аясында «Наурыз мейрамы» ұғымының пайда болу тарихы туралы тәрбие сағаттары ұйымдастырылса, қайырымдылық акциялары өткізіліп, мәдениет және ұлттық салт-дәстүріміз қайта жаңғырды, отбасы құндылықтары дәріптелді. Сондай-ақ Ұлттық киім кию күні тақырыптық челенж өткізу, мекемелерде ұлттық нақышта киіну басты назарда болды. Мерекелік іс-шара аясында байқоңырлықтар жаңарудың жарқын үлгісін көрсетіп, ағаш егуге атсалысса, ұлттық спортты ұлықтау да назардан тыс қалмады. Ынтымақтастықпен тұрмыс кешіп жатқан қала халқына арнайы бейнеқұттықтаулар ұйымдастырылса, домбыра мен қобызда ойнау, қыш құмыра жасау үрдісі өткізілді. Ең бастысы, жұлдызды қалашықта жыл басын тойлау ерекше сипатқа ие. Бұл күні киіз үйлер тігіліп, ұлттық тағамдар әзірлеумен қатар, ұлттық ойындарымызды ұлықтау да назардан тыс қалмайды. Соның ішінде «Байқоңырдың бауырсақтары» фестивалі көпшілік тағатсыздана күткен ерекше іс-шара болды», – дейді Президенттің «Байқоңыр» кешеніндегі арнаулы өкілінің қызметін қамтамасыз ету бөлімінің бас инспекторы Гүлсара Көшкімбаева.
Жалпы, 1955 жылы іргесі қаланған ғарыш айлағында екі елдің ақша айналымымен қатар, Қазақстан мен Ресей азаматтарының құқықтары келісім-шартта тең дәрежеде бекітілген. Соңғы мәліметке сәйкес, жабық қалашықта 57 мың 441 халық тұрады. Оның ішінде 40 615 адам Қазақстан азаматы болса, 15 507 адам Ресейдің үлесіне тиесілі. Ал 1 319 тұрғын өзге мемлекеттің азаматтығына ие.
Соңғы жылдары бұл қалашықта мемлекеттік бағдарламалар шеңберінде атқарылған жұмыстардың ауқымдылығы байқалады. Бірқатар нысан елімізге қайтарылса, білім, денсаулық саласындағы қордаланған мәселелер рет-ретімен шешіліп, қазақ тілінің қолданыс аясы кеңейіп түсті. Соның айғағындай, биылғы Наурыз мейрамын ұлттық нақышта атап өтуге ешқандай кедергі жоқ.
«Биыл байқоңырлықтар нағыз Наурыз мейрамын сезіне білді. Ұлттық құндылықтарымызға шөліркеген тұрғындар ерекше көңіл күйге бөленді. Мерекеге орай ұйымдастырылған арнайы онкүндік іс-шаралар аясында ұмыт бола бастаған салт-дәстүр, әдеп-ғұрыптарымыз қайта дәріптеліп, қаламыздан нағыз қазақылықтың лебі есіп тұр. Бұл мереке өскелең ұрпақтың өресін көтеріп, ұлтжанды тұлға болып қалыптасуына жол ашатыны сөзсіз», – деп қуанышымен бөлісті қала тұрғыны Рахымжан Досунбеков.
Осы орайда айта кету керек, ғарыш айлағындағы қалаішілік мерекелік шаралар мұнымен шектелмейді. Ұлық мерекеге орай, Қызылорда облыстық филармониясы тұңғыш мәрте жабық қалашыққа арнайы барып, өнер көрсететін болады. Мерекелік шашу 23 наурызға белгіленіп отыр.
«23 наурыз күні облыс әкімінің қолдауымен Қызылорда облыстық филармониясының әртістері Байқоңыр қаласына арнайы гастрольдік сапармен барады. Өнерпаздар сол күні ғарышты қалашықта ұйымдастырылғалы отырған үлкен мерекелік концертте өнер көрсетеді. Яғни, осы арқылы Байқоңыр халқына мерекелік көңіл-күй сыйлауды жоспарлап отырмыз», – деді облыстық филармония басшысының шығармашылық жұмыстары жөніндегі орынбасары Әзиза Іздіқұл.
Осылайша, көңілдің тоңын жібітетін ұлық мерекені кең көлемде атап өтуге байқоңырлықтар ұйымшылдықпен атсалысып жатыр екен. Байқоңырдағы он күнге созылған мерекелік шараның соңы ұлы тойға ұласады.
Ербақыт ЖАЛҒАСБАЙ,
Қызылорда облысы