Екі күн аралығында, яки 28 және 29 наурызда панельдік сессияларда өзара әрекеттесу мәселелері талқыланды.Негізгі тақырыптар – екіжақты ұйымдастырылған туризм және қытайлық өндірушілер үшін Қазақстанның инвестициялық тартымдылығы.Форумға қатысушылар үшін Қазақстанның 17 облысының стендтері орнатылды, онда өңірлердің туристік көрікті жерлері ұсынылған. Қарағанды облысы екі туристік орынды – Балқаш көлі мен Қарқаралы ауданын таныстырды.
– Визасыз режим саяхатшыларға Қытай мен Қазақстанның таңғажайып жерлеріне баруға мүмкіндік береді. Жыл басынан бері екі жаққа 400-ден астам туристік рейс жүзеге асырылды. Қытайлықтар тарапы тек біздің табиғи көрікті жерлерге ғана қызығушылық танытпағанын, өңірде қандай өндірістер бар, өнеркәсіптің қаншалықты дамығандығы туралы көп сұрағанын атап өткім келеді, – дейді Қарағанды қаласы әкімінің орынбасары Ләззат Ақылжанова.
Сарыарқаның құт мекені
Туризмге сұранып тұрған Қарқаралы облыс орталығынан 200 шақырым жерде орналасқан. Орталық Қазақстанның шексіз далалары арасындағы табиғаты ерекше – құт мекен. Қарағанды өңірінің 90 пайыздан астам орман алқабын Қарқаралы мемлекеттік ұлттық табиғи паркі алып жатыр.Қазір ауданда 3 мыңға жуық турист қабылдай алатын 37 орналастыру орындары бар. Жалпы, бұл нысандарда 300-ден астам адам жұмыс істейді. Жылдан жылға бұл нысандардың саны ұлғаюда, яғни жаңадан заманға сай демалыс орындары салынуда.
2023 жылы ауданға келген ресми туристер саны – 10,4 мың адам. Ал осы салада көрсетілген қызметтер көлемі – 109,3 млн теңге болды.Туризм саласын жүйелі дамыту мақсатында «Қарқаралы ауданының туризмін дамытудың 2023-2025 жылдарға арналған іс-шаралар жоспары» әзірленді.Қалада Құнанбай қажы мешітін жаңғыртылмақ, «Үш арыс» маңайында саябақ орнату көзделген. Сонымен қатар «Бәйтерек» монументін қайта жаңғырту, «Ту тұғыры» мемориалды алаңын құру, қалалық тоған аумағын және «Сасықкөл» тоғанын абаттандыру, қалаішілік және жаяу жүргіншілер жолдарын, ойын алаңдарын салу жоспарланған.
Туристерді табиғи нысандар – «Шайтанкөл», «Тас ертегісі» (Бассейн көлі), «Жиренсақал», табиғат мұражайы, тарихи нысандар – «Құнанбай қажы мешіті», «Үш үңгір», «Қызыл кеніш», «Алат қонысы», «Өлкетану» мұражайлары, «Қалмақ қорғаны», «Алтын адам» қорымы, Шалғайдағы тарихи-мәдени және сауықтыру нысандары – «Қоянды жәрмеңкесі», «Мәди үңгірі», «Саумалкөл», «Тәттімбет кесенесі» күтіп тұр.
«Көк теңізге» келушілер көп
Балқаш көлі аумағы жөнінен Каспий, Арал теңіздерінен кейінгі еліміздегі ең ірі су айдыны. Балқаш Қазақстанның оңтүстік-шығысына қарай Қарағанды, Алматы және Жамбыл облыстарының аумағында, географиялық тұрғыдан демалушылар үшін қолайлы жерде орналасқан.
Көлдің суы ерекше көгілдір түсте болғандықтан ел арасында «Көк теңіз» деп те аталады. Табиғаттың ерекше туындысы саналатын су айдынының тағы бір ерекшелігі көлдің шығыс жақ бөлігінің суы тұщы болса, батыс бөлігі ащы сулы. Балқаш жағажай туризмін ұнататындар үшін таптырмас орын. Мұнда жазғы демалу кезеңі маусым айында басталып қыркүйекке дейін созылады. Жаз бойы ауа температурасы 28-30 градус шамасында болады.
Міне, осы критерийлер жаз шықса, Балқашқа ағылатындардың қатарын көбейтуде. Соңғы жылдары Балқаштың суына шомылып, жағалауында күнге қыздырынғысы келетін саяхатшылардың қатары көбеюде. Алайда көлдің маңындағы демалыс орындары жазғы маусымда саяхатшылардың барлығын сыйғыза алмайды. Шілденің шіліңгір ыстығында Балқаш жағалауынан ине шаншар жер, демалыс үйлерінен жатын орын болмай қалады.Сондықтан көлдің игерілмеген жағалауларына демалыс орындарын салып, туристерге жағдай жасау бағытында шаралар атқарылуда.
Балқашта биыл туристер үшін 219 жайлы бөлмеге шақталған жеті жаңа демалыс аймағы салынады. Қалалық жағажайдың жағалау аймағын қайта жаңарту жалғасады.
Былтыр қала аумағына Ақтоғай ауданының бір бөлігі – Шұбартұбек және Торанғалық кенттері қосылды, олардың жалпы ауданы 8 744 гектарды алып жатыр.
Иә, туризмді дамыту өңірге инвестиция тартуға, туризмнің жаңа нысандарын және туризм саласына қызмет көрсету бойынша ілеспе қызметтерді ашуға мүмкіндік береді.Мұның бәрі жаңа жұмыс орындарын ашып, жергілікті бюджетті толықтыруға, қоршаған ортаны қорғауға зор серпін.
Әдебиет БЕЛГІБАЙҰЛЫ,
Қарағанды облысы