Араға біраз жыл салып, сол кейіпкерімізді қайта іздеп таптық. Бүгінде Бен Ладен Қызылорда қаласында тұрады. 22 жасты толтырып, жігіттік шағын бастан өткеріп жүр. Кішкентайынан алғыр да зерек болған ол туған ауылындағы №143 мектепті ойдағыдай тәмамдаған. Әрдайым ізінен ерген інісі мен қарындасына қамқор. Қолы қалт етсе сабағына зейін қойып, мұғалімнің үйге берген тапсырмасын да мұқият орындайтын болған.
«Бен Ладен өзінің ерекше есімді еншілегенін есейе келе түсінді. Бірақ оған өкпелеген жоқ. Мектепті жақсы бітіріп, әскери борышын абыроймен өтеп келді. Одан әрі білімін жетілдіру мақсатында жоғары оқу орнына түсті. Баламыздың болашағынан зор үміт күтетінбіз. Сенімімізді ақтады», – дейді анасы Айгүл Сейілханова.
Бен Ладен бүгінде университетте білімін жетілдірумен қатар, әскери салада қызмет атқаруға мүмкіндік алыпты. «Армансыз адам – қанатсыз құспен тең» деген қағиданы өмірлік ұстанымына айналдырған жігіт сол арман-мақсатына жету жолында таудай талап пен еселі еңбек қажет деп есептейді.
Аңсаған ТАҒЫБЕРГЕН