Бүгінге дейін су тасқынынан зардап шеккен өңірлерге 167 935 келі гуманитарлық көмек жеткізілген. Бұл туралы ОКҚ өткен брифингте ҚР Төтенше жағдайлар министрлігі Азаматтық қорғаныс және әскери бөлімдер комитетінің аға офицері Ерасыл Сайпаш баяндады, – деп хабарлайды Aikyn.kz.
«Су тасқыны басталғалы бері 96 472 адам, оның ішінде 31 640 бала құтқарылды. Әуе көлігімен 2 823 адам, соның арасында 865 бала қауіпсіз жерге жеткізілді. Уақытша орналасу пункттеріне 7 605 адам, оның ішінде 3 474 бала орналастырылды», – деді Ерасыл Сайпаш.
Су тасқыны болған аймақтардан 82 559 бас мал қауіпсіз жерге айдалған.
«Зардап шеккен өңірлерге 167 935 келі гуманитарлық көмек жеткізілді. Бірлескен күштердің көмегімен 8,5 млн текше метрден астам еріген қар суы шығарылды. 1,3 млн қапшық және 1,1 млн тонна инертті материал төселді. 2 750 тұрғын үй мен 1 816 аула аумағынан су ағызылды. Тәулік бойы авариялық-құтқару жұмыстарына 24 295 адам, 2 655 техника, 469 су сору және 139 жүзу құралы, 10 әуе көлігі жұмылдырылды», – деп атап өтті ол.
Дәл қазіргі сәтте Атырау, Ақтөбе, Ақмола, Қостанай, Солтүстік Қазақстан облыстарында 3 444 жер үйді, 336 аула аумағын су басып тұрғаны анықталды.
«Су шайған 105 автожол, оның ішінде 8 көпір мен 97 жол төсемі бақылауда тұр. Көлік қатынасынсыз қалған 69 елді мекен бақылауға алынды. Республикалық және жедел штабтар жұмысын жалғастырып жатыр. Барлық күш пен құралдар төтенше жағдайлардың алдын алу мен жоюға жұмылдырылды», – деді Ерасыл Сайпаш.