21 сәуір күні Жайық өзеніндегі су деңгейі қауіпті межеден асып, 8,5 метрге жетті. Соның салдарынан өзен жайылмасында орналасқан саяжай алаптары су астында қалып, Жайық және Шаған өзендерінің маңындағы шағын аудандарды су басты, – деп хабарлайды Aikyn.kz.
Қазір Орал қаласында су тасқынына қарсы шаралар күшейтілген режимде жүріп жатыр.
Облыс бойынша қорғаныс құрылыстарын нығайту шараларына 10,6 мыңнан астам адам және қала бойынша 6,4 мың адам, сондай-ақ Қазақстанның басқа өңірлерінен тартылған 2 мыңнан астам техника жұмылдырылған.
Премьер-министрдің орынбасары Қанат Бозымбаев су тасқынымен күрес үшін Маңғыстау, Ақтөбе облыстарынан, Астана мен Алматыдан тағы 500 әскери қызметші мен құтқарушыны Батыс Қазақстанға жіберуді тапсырды. Сонымен қатар Бозымбаев Оралдың периметріндегі су тасқынына қарсы қорғаныс құрылыстарын тексерді.
ТЖМ және Қорғаныс министрлігі желісі бойынша 200 адам Оралға барып, құтқару жұмыстарына кірісті.
Өңірдегі су тасқынының шарықтау шегі әлі алда деп болжануда.