Облыс орталығы Семей қаласында республикалық «Таза Қазақстан» акциясы аясында «Семей орманы – менің орманым» көшет отырғызу іс-шарасы өткізілді. 600-ге жуық адам қатысқан акцияда 23 800 түп екі жылдық қарағай көшеттері отырғызылды. Жалпы, биыл «Семей орманы» резерваты мемлекеттік орман қорының 6100 гектар алқабына 28 млн 700 мың дана өскін егуді жоспарланған. Жұмыс екі кезеңге бөлінеді. Мәселен, көктемде 5 мың гектардан астам, ал қалған 961 гектарға күзде қарағайдың жас өскіндерін жерсіндіру міндеті тұр. Мамандар қарағай көшеттерін отырғызудың өз ерекшелігі барын айтады. «Резерватта ағаштарды қолдан отырғызу және автоматтандырылған отырғызу тәсілі жүзеге асуда. Көрші тұрған екі көшеттің арасы 70-80 сантиметр болуға тиіс. Егілген көшеттер орманшы мамандар бақылауында 2 жыл болады, ары қарай табиғи жолмен өсіп жетіледі. Көшеттер арнайы орман тұқым бағында Бородулиха ауданында өсірілген», – деді орманшы Нұржан Бақытбекұлы.
Акцияға қатысқан облыс әкімі Нұрлан Ұранхаев бұл бастаманың басты мақсаты өңірдің биоалуантүрлілігі мен экожүйесін қорғауда шешуші рөл атқаратын орманды сақтау екенін атап өтті.
«Бұл акция бірреттік шара емес. Алдағы уақытта да жалғасады. Тазалық жұмыстарына бәріміз бір кісідей атсалысып, аймағымызды көркейту арқылы өскелең ұрпаққа үлгі бола аламыз. Бұл «Атадан мал қалғанша, тал қалсын» деген игі дәстүрдің жалғасы», – деді аймақ басшысы.
Айта кету керек, семейліктердің игілікті ісін еліміздің Президенті де қолдады. «Мемлекет басшысы Қасым-Жомарт Тоқаев Семей қаласы төңірегіндегі өртенген қарағайлы орманды қалпына келтіру жөніндегі жергілікті тұрғындардың бастамасын қолдады», – деп Президенттің кеңесшісі – Президенттің Баспасөз хатшысы Берік Уәли Facebook парақшасына жазды.
Абай облысы аумағында 8 сәуірден бері 12 мыңға жуық аула ретке келтіріліп, тұрмыстық қатты қалдықтар полигонына 13 мың тоннадан астам қалдық шығарылыпты. Бұған қоса, 80 мың ағаш, 22 мың бұта отырғызылған. Қалалар мен аудан орталықтарындағы 218 саябақ пен 85 тарихи-мәдени ескерткіш абаттандырылды.
«Осындай игі шаралар арқылы жерлестерімізді қоршаған ортаны қорғау мен экология мәселелеріне назарын аударуды басты мақсат етіп отырмыз», – дейді Абай облысы мәслихатының төрағасы Қуаныш Сүлейменов.
Оның айтуынша, көшет отырғызу арқылы аймақтың экологиясын жақсартып, қарағайлы орманды жедел қалпына келтіру негізгі мақсатқа айналып отыр.
«Мемлекет басшысы Қасым-Жомарт Тоқаев Семей қаласы төңірегіндегі өртенген қарағайлы орманды қалпына келтіру жөніндегі жергілікті тұрғындардың бастамасын қолдағаны туралы ақжолтай хабар жетті. Тұтас ел көлемінде кең қолдауға ие болған «Таза Қазақстан» экологиялық акциясы аясында облысымызда осындай маңызды шаралар өте беретініне сенімдімін. Бұл ретте акция тұрғындарды тазалық жұмыстарына ұйытқы, жақсы істерге дәнекер болуға шақырады. Абай облысы мәслихат депутаттары ретінде біз де экологиялық акцияға белсене қатысудамыз, жылдағы дәстүрге сәйкес апта сайын қаланың әр аумағында сенбіліктер ұйымдастырып тұрамыз. Себебі табиғатты аялап, барынша қорғап қалу – өзекті мәселе. Ал қаламыздың тазалығын сақтау әрбір қала жұртшылығының парызы мен міндеті болса, қоршаған ортаны жасыл желекке айналдыру қоғамның алдына қойған бұлжытпас қағидасы болуға тиіс», – дейді мәслихат төрағасы.
Семейде орман отырғызуға қатысты жоспарлы жұмыстардан бөлек «Саябақтар шеруі» атты дәстүрлі көшет егу шарасы да жақын арада қолға алынбақшы.
Ұлағат БЕКБОЛАТ