Салтанатты рәсімде мектеп директоры Ляззат Култаева қонақтар мен ұстаздарды, оқушыларды құттықтап, мерекелік жиынның шымылдығын ашты.
– Армысыздар, аса құрметті ардагерлер, қонақтар, ұстаздар, және оқушылар! Отан қорғаушылар күні мен жеңістің 79 жылдық мерекесіне орай және мектебімізге халық батыры Рақымжан Қошқарбаевтың есімін беру, ескерткіш тақтаның ашылу рәсіміне қош келдіңіздер. Мектебіміздің Берлиндегі Рейхстагқа алғаш болып жеңіс туын тіккен қазақ халқының батыр ұлының есімімен аталуы біз үшін зор мақтаныш. Бүгінде Рақымжан Қошқарбаев атамыздың ерлік, батырлық өнегесі ұрпақты Отанға деген сүйіспеншілік рухта тәрбиелеудің озық үлгісіне айналып отыр. Барлықтарыңызға қуаныш құтты болсын! – деді Ляззат Култаева.
Өскелең ұрпақты патриоттық рухта тәрбиелеп, Отанға деген сүйіспеншілікті және ерлік пен өрлік қасиетті сіңіруде мектептің қазақтың батыр ұлдарының есімімен аталуының мәні мен маңызы зор. Осы орайда №44 орта мектебінің ардақты ұстазы, Отан алдындағы борышын адал атқарған Ауған соғысының ардагері Бақытбек Терсебаевтың мектепке Рақымжан Қошқарбаевтың есімінің берілуіне қосқан үлесі зор. Ол батыр туралы тарихи естеліктер мен мұраларды жинақтап, батырға арналған кабинеттің ашылуына көп еңбек сіңірді. Ардагер ұстаз да қонақтар мен ұстаздарды, оқушыларды мерекемен құттықтады.
– Мектебімізге Рақымжан Қошқарбаевтың есімінің берілгеніне қатты қуандым. Халқымыздың ел қорғаған ерлері мен батыр ұлдарының қаһармандығы балаларымызға, ұрпағымызға мұра болып, мәңгі жасай берсін. Мерекелеріңіз құтты болсын, – деді Бақытбек Терсебаев.
Ал Астана қаласы Білім объектілерінің тыныс-тіршілігін қамтамасыз ету және абаттандыру бөлімінің басшысы Мәдина Сүлейменова жиналған көпшілікті мерекемен құттықтап, Рақымжан Қошқарбаевтың өмірі мен ерлігі туралы айтып берді.
– Мереке құтты болсын! Рақымжан атамыздың атымен аталған мектепте оқитын барлық оқушыға, жас буынға елін-жерін қорғаған батырларымыздай ержүрек болып өсіңдер деп тілеймін, – деді ол.
Мерекелік кеш мектеп өнерпаздарының орындауындағы халқымыздың асқақ рухты батырлық-ерлік туралы ән-күйімен өрнектеліп, мың бұралған биімен көмкерілді. Мектеп оқушылары дайындаған сахналық көрініс батырдың өмірі мен соғыс жылдарындағы майдан даласынан сыр шертті. Мерекелік іс-шарада ақ тілектер ақтарылып, құттықтаулар толастамады.
Тілекгүл ЕСДӘУЛЕТ