Бір айдан астам уақытқа жоспарланған акция «Таза өлке», «Киелі мекен», «Жасыл аймақ», «Өнегелі ұрпақ», «Мөлдір Бұлақ» секілді апталықтар аясында азаматтар қала көшелері мен аулаларды, ауылдарды қоқыстан тазартып, абаттандыру және көшет отырғызу жұмыстарына жұдырықтай жұмылды.
Ал Астанада «Таза Қазақстан. Астана – тазалық пен тәртіптің үлгісі» тақырыбында ауқымды экологиялық акция өтіп жатыр. Экоакция аясындағы «Өнегелі ұрпақ» аталған апталыққа қатысқан қалалық мәслихат депутаттары Байқоңыр ауданының өмірлік жағдайы қиын балаларды қолдау орталығының аумағында санитарлық тазарту жұмыстарын жүргізді. VII және VIII сайланған мәслихат депутаты Динара Оразалина бірнеше жыл бойы Орталықтың барлық іс-шарасына қатысып, балаларды қуантуға үнемі атсалысып жүргенін айтты.
«Біз сенбіліктерге ғана емес, жаңа жыл және басқа да мерекелердің барлығына қатысамыз. Маған балаларға келу, оларға көмектесу ұнайды. Балалардың бәрі жақсы күтімді және көңілді, өйткені оларға орталық қызметкерлерінің қолдауы зор. Демалыс күндері оларды тамақ пісіруге үйретеді. Мамандығым дәрігер. Өзім үш баланың анасымын, бірақ мұнда қайта-қайта келуден шаршамаймын. Өйткені балалардың қуанышты жүздерін көру мен үшін ғанибет», – дейді депутат.
Орталық директорының міндетін атқарушы Аягөз Нәбиеваның айтуынша, арнаулы әлеуметтік қызметтерге мұқтаж балаларды қолдау орталығына негізінен жетім балалар мен ата-анасының қамқорлығынсыз қалған балалар түседі. Зорлық-зомбылық көрген балалар және девиантты мінез-құлқы бар балалар да келеді.
«Бүгінде орталықта 70 адам тіркелген, оның 44-і тұрақты және 36-сы уақытша тұратындар. Мұнда ата-ана құқығынан айырылған отбасының балалар және заңды өкілдері жоқ адамдар тұрады. Бүгінгі сенбілікке біз қонақтарды – қалалық мәслихат өкілдерін шақырдық. Өйткені олардың балаларымызбен бірге жасыл желектерді (қияр мен қызанақ көшеттерін) отырғызуға және аумағымызды жинауға қатысқанын қалаймыз. Қалалық мәслихатпен бірлескен жұмыс тұрақты негізде жүріліп жатқанын атап өткім келеді», – деді Аягөз Нәбиева.
«Таза Қазақстан. Астана – тазалық пен тәртіптің үлгісі» экологиялық акциясының «Өнегелі ұрпақ» апталығына елордалық Денешынықтыру және спорт басқармасына қарасты №2 және №5 мамандандырылған олимпиадалық резервтегі балалар-жасөспірімдер спорт мектебі мен Олимпиадалық резерв дайындау орталығының қызметкерлері де қатысты.
«Өнегелі ұрпақ» экологиялық апталығы ардагерлер мен қарттар үйлерінің аулаларын, аумақтарын тазалауға және абаттандыруға арналғандықтан, мекеме қызметкерлері мен бірқатар спортшы ардагерлердің ауласын тазалап, шөптерін орып, ауланың қоқыстарын шығарды. Сонымен қатар қалалық Спорт басқармасына бағынысты мекемелердің қызметкерлері ерікті түрде қиын өмірлік жағдайдағы балаларды қолдау орталығының аумағын, қала тұрғыны бірінші топтағы мүгедектігі бар Берен Өтебаеваның ауласын, Пригородный тұрғын алабында орналасқан зейнеткердің бақшасын, бірнеше көпбалалы отбасының аулаларын қоқыстан тазарту мен абаттандыру жұмыстарына көмек көрсетті. Апталық аясында қаланы санитарлық тазарту, нөсер және арық кәріз желілері, көшелерді, тротуарларды, кварталішілік аумақтарды, қоғамдық кеңістіктер мен аулаларды тазалау жұмыстары жүріліп жатыр.
Аталған апталыққа Астана қаласының Денешынықтыру және спорт басқармасының басшысы Василий Левит және елімізге танымал кәсіпқой боксшы, Рио Олимпиадасының чемпионы Данияр Елеусінов, ауыр атлетикадан әлем чемпионы Едіге Емберді сынды танымал спортшылар да күрек-қайла ұстап, қаланы абаттандыруға атсалысты.
Олар қала маңындағы «Светоч» балалар үйінің жанындағы орта мектепте сенбілік ұйымдастырды. Алдымен аула ішіндегі қоқыстарды тазалап, есік алдын сыпырып, өсіп кеткен шөптерді шауып, гүлдердің түбін қопсытты.
– «Таза Қазақстан» ауқымды экологиялық акцияның 4-аптасы «Өнегелі ұрпақ» ұранымен өтуде. Елорда бойынша белсенді қала тұрғындары ардагерлердің, балалар мен қарттар үйлерінің аулаларын тазалап, абаттандыруда. Айтулы экологиялық акцияға біз де өз үлесімізді қосуға тырысып жатырмыз. Әріптестеріммен ақылдаса келе Астана маңында орналасқан «Светоч» балалар үйіне келдік. Бұл балалар үйінде қазір 19 бала тәрбиеленіп жатыр, – деді Астана қаласының Денешынықтыру және спорт басқармасының басшысы Василий Левит.
Атап айтар болсақ, «Светоч» балалар үйі жанындағы орта мектеп өз жұмысын 1999 жылы қарашада Лилия Вениаминова Соловьеваның үш бөлмелі пәтерінде бастаған болатын. Бүгінде балалар үйінің тәрбиеленушілері аудандық Олимпиадаларға, конкурстар мен жарыстарға белсенді қатысып, құрметті орындарға ие болып жүр.
«Менің ойымша, бұл науқан жақыныңа көмектесу мен оларды қолдаудың тамаша үлгісі. Біз қарияларға, қиын жағдайға тап болған балаларға көмектесу, мереке ұйымдастыру олар үшін ғана емес, өзіміз үшін де маңызды. Мұндай іс-шаралар адамдарды жақындастырады, жүрегімізге жылулық ұя салады. Біз осындай азғантай ғана жұмысымыз арқылы олардың көңілін көтердік деген үміттеміз. Балалардың көзіндегі қуаныш біз үшін ең жақсы алғыс болды», – дейді Рио Олимпиадасының чемпионы Данияр Елеусінов.
Астана тұрғындарын түгелге дерлік қамтыған экологиялық акцияға отандастарымыздан бөлек, әлемнің атақты спорт жұлдыздары, аты аңызға айналған футболшылар Коло Туре мен Фадига Халилу да қатысты.
Елімізге футболдан жас өрендерді іріктеу мақсатында Super bol жобасына арнайы келген Коло Туре мен Фадига Халилу елордадағы Қазақстан футбол федерациясы аумағына көшет отырғызды.
«Қазақстанға футбол жобасына арнайы қонақ ретінде бірінші рет келдім. Тек жасыл алаңда ғана емес, қаланың экологиясын сақтау мақсатында ұйымдастырылған акцияға қатысқаныма өте қуаныштымын. Бұған дейін де көптеген қалада болдым. Ал Астананың өзіндік әдемілігі бар. Тазалығы жолға қойылғаны көрініп тұр. Бастысы мені сыйлап, шақырғандарыңызға қуаныштымын!» – деді «Арсенал», «Манчестер Сити», «Ливерпуль» сапында доп тепкен футболшы Коло Туре.
Астананы жасыл желекпен көмкерілген, әсем қалаға айналдыру мақсатында биыл барлығы 1,1 миллион көшет отырғызу жоспарланған болса, соңғы үш аптада 74 мыңнан астам көшет отырғызылған. Ағаш егу жұмыстарына белсене жұмылған елордалық жастар ұйымдары экологиялық акция аясында «Нұрлы жүрек» әлеуметтік қызмет көрсету орталығының аумағында ағаш отырғызды. Аталған мекеменің жұмысшылары мен Алматы ауданы әкімдігінің қызметкерлері, «Жас сарбаз» қозғалысының тәрбиеленушілері, жастар ұйымдарының өкілдері, қоғам қайраткерлері және еріктілер Орталық аумағына 40-қа жуық алма ағашын отырғызды.
«Нұрлы жүрек» әлеуметтік қызмет көрсету орталығының директоры Нұрбол Зұлқарнаев әрбір азамат қаланың дамуына үлес қосуға міндетті екенін атап өтті.
«Біздің орталықта 271 бала арнайы әлеуметтік қызметтер алады. Болашақта бұл балалардың өз алма бағы болады деп үміттенеміз. Біз әр бейсенбіде қосымша экоакция өткізіп, аумақты тазалаймыз. Әрқайсымызда азаматтық сана болуы керек. Тазалықты сақтап, қаланы ретке келтіруіміз қажет», – дейді Нұрбол Зұлқарнаев.
Астана қаласы әкімдігінің Жастар саясаты мәселелері басқармасының ресми өкілі Әлібек Жүсіповтің айтуынша, ең алдымен, іс-шараға қатысушылар ауланың ішіндегі қоқыстарды тазалап, аумақты сыпырып, ағаш отырғызу үшін қажетті құралдарды дайындады.
«Өнегелі ұрпақ» экоаптасы аясында біз 4 мектептің аумағында, сондай-ақ «Нұрлы жүрек» әлеуметтік қызмет көрсету орталығында ағаш отырғызу іс-шарасын өткіздік. Алда басқа мектептердің аумағында алма ағаштары мен қарапайым көшеттер отырғызуды жоспарлап отырмыз», – деді Әлібек Жүсіпов.
Алма ағашын отырғызуға «Жас сарбаз» қозғалысының тәрбиеленушілері мен «Бақытты Шаңырақ» қоғамдық қорының жастары да өз үлестерін қосты.
«Біз «Таза Қазақстан» экоакциясына, атап айтқанда ағаш отырғызуға қатыстық. Акцияның маңызды екенін атап өткім келеді және төрт апта бойы біз қаланы тазалауға қатыстық. Акция жастарды дұрыс іс-әрекетке бағыттайды», – деді «Бақытты Шаңырақ» қоғамдық қорының басшысы Ботагөз Сұлтанова.
Ал «Жас сарбаз» қозғалысының тәрбиеленушісі Альбина Қайроллаева:
«Біз балалармен бірге «Таза Қазақстан» бастамасын қолдау үшін қатысамыз. Менің ойымша, қаланы тазалау арқылы біз денсаулығымызды жақсартамыз. Сондықтан әлеуметтік қызмет көрсету орталықтарының аумағында сенбіліктер ұйымдастыру аса маңызды», – дейді.
Қаланың түрлі мекемелері мен ұйымдарының, жастардың жұдырықтай жұмылуымен кең ауқымды экоакция аясында аумақтарды санитарлық тазарту, нөсер және арық кәріз желілері, көшелерді, тротуарларды, кварталішілік аумақтарды, қоғамдық кеңістіктер мен аулаларды тазалау жұмыстары жүргізілуде. Сондай-ақ жасыл желектерді күтіп-баптау және отырғызу, сауда нысандарына іргелес аумақтарды жинау, көгалдар мен гүлзарларды орнату, рұқсат етілмеген полигондарды жою және тағы да басқа экологиялық бағыттағы жұмыстар жоспарлы түрде жүзеге асып жатыр.
Тілекгүл ЕСДӘУЛЕТ