Экс-министр Қуандық Бишімбаевтың адвокаты Ләйла Рамазанова Orda.kz тілшісіне 24 жыл түрмеге кескен сот үкіміне шағымдануға ниетті екенін айтты, – деп хабарлайды Aikyn.kz.
«Иә, біз шағымданамыз. Әрине, біз үкіммен келіспейміз. Жоспарымыз қандай екенін айта алмаймын, біз әлі құжаттарды алған жоқпыз. Сот үкімі шыққаннан кейін бес күннен кешіктірмей оларды қабылдауымыз керек»,– деді Ләйла Рамазанова.
Ал жәбірленуші тараптың адвокаты Жанна Оразбақованың сот отырысы нәтижесіне көңілі толғанға ұқсайды. Ол өзінің әлеуметтік желілерінде әділқазыларға объективтілігі мен әділдігі үшін алғысын білдірді.
Үкім өзгеріссіз қалса, Orda.kz хабарлағандай, Бишімбаев жазасын Аршалыдағы колонияда өтейтін болады.
Еске салайық, алдын ала тыңдауларды қоса алғанда, сот процесі екі айдан астам уақытқа созылды. Нәтижесінде, алқабилер көпшілік дауыспен үкім шығарды: Қуандық Бишімбаев кінәлі, ол 24 жылға бас бостандығынан айырылды. Бақытжан Байжанов қылмысты жасырғаны үшін төрт жылға бас бостандығынан айырылды.
Салтанат Нүкенованың ағасы Айтбек Амангелді бұны «іс жүзінде қартайғанша» деп атады, өйткені 24 жылдан кейін Бишімбаев 68 жасқа толады.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.