Мемлекет басшысының Жарлығымен жүзеге асқан жаңалықтан бергі кезеңде Қонаев қаласында жаңа құрылыстар салу, инфрақұрылымдарды жаңарту, көшелер мен аулаларды абаттандыру және шаһарды тұрмысқа барынша қолайлы ету бағытында тағы да басқа көптеген жұмыстар атқарылды. Облыс орталығы қанатын кеңге жайып, көріктене түсті. Алайда өздерінің иықтары көтере алмайтын міндеттерді мойындарына алып алған соң оны уақытында жүзеге асыра алмай, «ұзын арқан, кең тұсауға» салатын жауапсыз компаниялар кесірінен «сақалды» құрылыстар қатары да артып отырғанын, жөндеу жұмыстарының жөнсіз созылып кетуі жиілегенін жасырып қалуға болмайды. Соңғы кезде осындай мәселелер көбейіп, тіптен күрделеніп барады.
Осы жағдайға алаңдаушылық білдірген қала әкімі Асхат Бердіханов аппарат жиыны барысында құрылысы тым ұзаққа созылған нысандарға қатысты түйткілді жағдайларды жайып салып, жауапсыз мердігерлерге қоса, осы салаға жауапты тұлғалардың бейқамдығын қатаң сынға алды.
«Бақылау мүлде жоқ. Компаниялар бөлінген ақшаны шоттарына аударып алады да, сөзбұйдаға салып, құрылысты созып жүре береді. Ондайлардың жұмысын бақылап, заңды тұрғыда талап қоюға тиістілер де тым жайбарақат. Соның салдарынан қала тұрғындары тарапынан орынды наразылық туындап, облыс орталығының бүгінгі келбетіне көңілі толмаған жұртшылық реніштерін білдіруде. Сондықтан тез арада нақты шаралар қабылдап, күрделі мәселенің күрмеуін тарқатыңдар», – деді Асхат Бердіханов қарамағындағы құрылыс саласына жетекшілік жасаушыларға қарата.
Әкімнің сынына қалғандардың бірі SHEBERBUILD ЖШС-ның жұмысы халықтың да, атқарушы биліктің де көңілінен шықпай отыр. Аталған компания шаһардағы жылу жүйелерін ауыстыру және Қ. Қайсенов атындағы №4 орта мектепті күрделі жөндеуден өткізу, №10 шағын ауданда 3 тұрғын үйді салу бойынша конкурсты ұтып алған. Осылардың ішіндегі білім ошағының күрделі жөндеуі 2024 жылдың 30 сәуірінде аяқталуы керек болған. Алайда компания сылбырлық танытып, белгіленген мерзімде жөндеуді аяқтай алмады. Жұмыстың тек 75 пайызын ғана орындаған. Осыған байланысты қалалық білім бөлімі компанияның ісін сотқа жіберіпті.
Аталған серіктестік мектепті күрделі жөндеуден өткізуді белгіленген уақытта аяқтай алмағанымен қоймай, қаладағы №2, 4, 5 шағын аудандардың жылу желісін ауыстыруды да әбден кешіктірген. Бұл маңызды міндетті осы жылдың қаңтарында межесіне жеткізуі керек еді. Бірақ былтырғы қыркүйек айынан бері жоспардан кейін қала бастаған компания жұмыстың орындалу кестесін мүлде сақтамаған. Қалалық ТҮКШ бөлімі туындаған мәселеге байланысты компанияға бірнеше рет хат жібергенімен ешқандай нәтиже шықпапты. Ақыры, іс Алматы облысы мамандандырылған ауданаралық экономикалық сотына жолданатын болды. ТҮКШ бөлімі қос тараптың келісімшартын бұзу әрі мердігерді жосықсыз деп тану туралы талап қоюды көздеп отырған көрінеді.
Тағы бір «сақалды» құрылыс №10 шағын аудандағы 180 пәтерлі тұрғын үйлер былтыр желтоқсанда қолданысқа берілуі керек болған. Желтоқсанды қойып, құрылысы әлі күнге толық аяқталмапты. Құрылыс бөлімі бірнеше рет хат жолдап, кейін сотқа беріп, мерзімді 20 маусымға дейін созды.
Болат АБАҒАН,
Алматы облысы