Одан бөлек, Ұлттық құрама спортшылары Болгарияның Варна қаласында өткен челленджер санатындағы әлемдік турнирден алтынмен оралды. Осы орайда Александр Ким шәкірттерінің Олимпиада қарсаңындағы әлеуетін бір саралап көрген едік.
Карими тарихи жүлде алды
Ташкенттегі Азия чемпионаты Қазақстан ерлер құрамасы үшін айтарлықтай сәтті өтті. Бұл сында отандық гимнастар бұрын-соңды болмаған нәтиже тіркеді. Бір әттеген-айы – Париж Олимпиадасына берілетін құрлықтағы соңғы әрі жалғыз жолдама бұйырмады. Біздің команда сапынан Милад Карими мен Нариман Курбанов Олимпиадаға лицензия алып қойған. Сол себепті, соңғы квотаға Дмитрий Патанин таласқан болатын. Өкінішке қарай, Патанин көпсайыста 75.598 ұпаймен небәрі бесінші орында қалды.
Көпсайыста филиппиндік Карлос Юло чемпион атанса, қазақстандық Милад Карими 84.632 ұпаймен күміс жүлдегер атанды. Қоланы өзбекстандық Абдулло Азимов иеленген. Юло да, Карими де Париж ойындарының квотасын алып қойғандықтан, Азия құрлығына берілген жалғыз жолдаманы жарыс қожайыны, чемпионатты үшінші орынмен аяқтаған Азимов иеленді.
Енді Каримидің жетістігіне тоқталайық. Милад Карими жекелеген снарядтарда жүлде алғанымен, бұған дейін бірде-бір жарыста көпсайыстан тұғырға шықпаған. Карими ғана емес, Қазақстан құрамасы Азия чемпионатында көпсайыстан жүлдеге ілікпепті. Демек, Ташкенттегі бұл күміс медальдің орны тұтас құрама үшін ерекше. Оның үстіне, Карими жай спортшыға емес, әлем чемпионы әрі Олимпиада жүлдегеріне есе жіберді.
Одан бөлек, Милад Ташкент төрінде тағы екі рет тұғыр биігінен көрінді. Алдымен еркін жаттығудан күміс алса, өзінің оң жамбасына келетін кермедегі жаттығуда чемпион атанды. Милад Карими де өз мансабындағы сәтті жарыстардың бірін өткізді десек, артық емес. Бакудегі әлем кубогында аздап жарақаттанып қалған ол Ташкентте кеңінен көсіліп, бір өзі үш медаль арқалап қайтты.
«Милад қоссырықтан да, кермеден де финалға шықты. Бірақ кермедегі жаттығуға бар зейінін қою үшін қоссырықтағы финалдан бас тартты. Керме Каримидің жақсы орындайтын жаттығуы. Ол ақтық сында барлық қарсыласын бағамдап барып, бағдарламаны ең соңынан орындады. Оның комбинациясы қиындығы жөнінен 6.5-ті құрайтын. Соны таза атқарып шықты. 15.000 ұпай алды, бұл жаман көрсеткіш емес», – дейді бас бапкер Александр Ким.
Нариманның екінші алтыны
Жақында ғана Париж Олимпиадасына жолдама алған Нариман Курбанов та маңызды жарыс қарсаңында қарқынын үдетуде. Бапкерлер әлем кубогінің шешуші кезеңінен соң Курбановқа біраз ескерту жасаған еді. Әсіресе, комбинация соңында секіретін тұста Нариманның үнемі қате жіберетіні мамандар көңілін күпті қылып қойған. Одан бөлек, өзінің қолынан келетін базалық қиындықты да ойдағыдай атқарған жоқ. Міне, осы қателіктерді спортшы шешім шығарған сыңайлы. Өзбекстандағы Азия чемпионатының іріктеу кезеңінде қазақстандық спортшы 15.666 ұпай жинады. Мұндай бағаны әлемде ешбір гимнаст алмаған (тұтқалы ат снарядында). Ал финалда Нариман 15.600 ұпаймен топ жарды. Бұл аталған снарядтағы ең жоғарғы ұпайлардың бірі. Егер Курбанов осы деммен жалғастырып, 6.7 саналатын базалық қиындықты қатесіз орындап шықса, Олимпиада жүлдесіне де қол жеткізері сөзсіз. Бұл Нариманның Азия чемпионатында жеңіп алған екінші алтыны. Курбанов былтыр да сары құрлықтың көш басында болған.
Өкінішке қарай, командалық жарыста Қазақстан құрамасы үздіктер қатарынан көріне алмады. Бұған команданың белсенді мүшесі Ілияс Азизовтің жарыс кезінде жарақат алуы себеп болды. Бүгінде спортшы дәрігерлер бақылауында.
Қыздардың тұңғыш жүлдесі
Ерлердің ізін ала, Ташкент төрінде қыздар арасындағы лицензиялық Азия біріншілігі өтті. Бұл сында Қазақстан атынан жүлдеге үмітті Аида Бауыржанова бақ сынады. Аида биылғы маусымда әлем кубогінің финалына екі рет шығып, елімізде ақсап тұрған әйелдер арасындағы спорттық гимнастикаға дем бергендей болған. Сол себепті, Ташкент төрінде де Бауыржановаға жолдама бұйырып қалар деген үміт оты маздады. Бірақ біздің қыз 50.365 ұпай жинап, төртінші орынға тұрақтады. Бұл сында қытайлықтар Цзиафей Ху мен Синуй Цин өзара жүлде бөлісті. Ал сары құрлықта сарапқа салынған жалғыз әрі соңғы жолдаманы филиппиндік Эмма Малабуйо (50.398) жеңіп алды. Ол Азия біріншілігін үшінші орында аяқтаған.
Десе де, бұл өкініштің орны толды. Соңғы жарыс күнінде Аида Бауыржанова еркін жаттығудан Азия чемпионатының қола жүлдегері атанды. Ол Филиппин мен Қытай спортшыларына ғана жол беріп, 13.066 ұпаймен үздік үштікті тұйықтады. 1996 жылдан бері өтіп келе жатқан Азия чемпионаттарының тарихында Қазақстан әйелдер құрамасы бірде-бір медаль алмаған екен.
Аиданың жеңісіне басқадан бұрын, өзінің сүйіктісі әрі командаласы Нариман Курбанов қатты қуанды.
«Талай қиындық, көз жасы арқылы жеткен медаліміз құтты болсын! Сенімен мақтанамын», – деп жазды Курбанов желідегі парақшасында.
Азия чемпионатынан оралған бойда гимнастарымыз Болгарияның Варна қаласында өткен челленджер санатындағы халықаралық сынға қатысты. Бұл бәсекеде Нариман Курбанов тұтқалы ат снарядынан топ жарса, еркін жаттығудан Дмитрий Патанин алтын, Салим Асанов қола медаль жеңіп алды.
Париж Олимпиадасына дейін спортшыларымыз тағы бірнеше турнирде бақ сынайды.
Арда КЕМЕЛ