Бұл жоба Мемлекет басшысы Қасым-Жомарт Тоқаевтың тікелей бастамасымен жүзеге асырылып жатқанын айта кеткен жөн. Ол мәдениеттер мен халықтар арасындағы диалогті дамытуға және еліміздің жетістіктерін шетелдерде дәріптеу мақсатында танымалдылығын арттыруға бағытталған.
Министр алғысөзінде Біріккен Ұлттар Ұйымының Жарғысы мен халықаралық құқық негізіндегі көпвекторлы және сындарлы сыртқы саясатқа айқын балама жоқ екенін, Президент Қасым-Жомарт Тоқаевтың осы бастамасының маңызы ерекше зор екенін атап өтті. Сондай-ақ бүгінде еліміз дүниежүзілік қауымдастықта бейбітшілік пен тұрақтылықты ту еткен әрі қарқынды даму жолындағы мемлекет ретінде кеңінен танылғанын айрықша атады.
– Әлемнің 75 елінде 114 шетелдік мекемеміз бар. Былтыр біз шетелде 3 жаңа мекеме аштық. Биыл қосымша 2 елшілік, 1 тұрақты өкілдік және 4 бас консулдық өз жұмысын бастады. Жылдың соңына дейін тағы 5 мекеме ашуды жоспарлап отырмыз. Қазақстанда шетелдердің 71 елшілігі мен 25 консулдық мекемесі және 33 халықаралық ұйымның өкілдіктері аккредитация алған. Қазақ елінің жеті бірдей көрнекті өкілін «Ізгі ниет елшісі» ретінде тағайындау да осы бағыттағы Мемлекет басшымыздың бірізді әрі төрт шұғыласы тең сыртқы саясатына үлкен қолдау деп білеміз, – деді Сыртқы істер министрі.
Бұл жобаға халықаралық қоғамдастықта Қазақстан туралы оң пікір қалыптастыруға зор үлесін қосып жүрген еліміздің қоғам қайраткерлері шақырылды. Олардың арасында скрипкашы-виртуоз, дирижер, Азия-Тынық мұхиты өңірі оркестрлері Альянсының директоры Марат Бисенғалиев, Олимпиада чемпионы, велошабандоз Александр Винокуров, суретші және антиядролық қозғалыс белсендісі Кәріпбек Күйіков, University Medical Center корпоративтік қорының басқарма төрағасы, кардиохирург Юрий Пя, саясаттану ғылымының докторы және тарихи карталарды зерттеуші Мұхит-Ардагер Сыдықназаров, Н.Тілендиев атындағы Мемлекеттік академиялық фольклорлық-этнографиялық «Отырар сазы» оркестрінің бас дирижері Динара Тілендиева, Adam лақап атымен әлемдік танымалдыққа ие болған эстрада әншісі Мирхидай Мирфарух пен әлем рекортын жаңартқан алып күш иесі, Гиннес кітабының рекордшысы Сергей Цырульников бар.
Сонымен қатар министр көпұлтты халқымыздың келісім мен диалогке деген дәстүрлі ықыласына сай генетикалық коды сыртқы әлеммен мазмұнды және өзара тиімді қарым-қатынастардың кепілі екеніне тоқталды.
– Біз мұны шетелде насихаттауымыз қажет. Осы тұста Біріккен Ұлттар Ұйымының Жарғысы мен халықаралық құқық негізіндегі көпвекторлы және сындарлы сыртқы саясатқа балама жоқ екендігі айқын. Біздің көзіміздің қарашығындай сақтайтын ең жоғары құндылықтарымыз – еліміздің егемендігі, тәуелсіздігі және аумақтық тұтастығы. Бұл экономикалық өсу және халықтың әл-ауқатын арттырумен қоса, Қазақстанның халықаралық беделі мен рөлін паш етеді, – деген М.Нұртілеу алдағы уақытта «Ізгі ниет елшілерінің» игі миссиясы бұрынғыдан да өзекті бола түсетінін жеткізді.
Министр сөзінің соңында «Ізгі ниет елшілерінің» әлем қауымдастығына Қазақстан туралы объективті хабар жеткізетін парасат үні болатынына ел сенім артатынын атап өтті.
«Бұрын-соңды болмаған геосаяси жағдайда, халықтық және мәдени-гуманитарлық дипломатияның алар орны бөлек. «Әлемдік сахналарда, ареналарда және конференцияларда сіздердің жеңістеріңіз бен тамаша өнер көрсетулеріңіздің арқасында еліміздің көк Туы әлемнің түкпір-түкпірінде көтеріліп, мемлекеттік Әнұран салтанатты түрде шырқалады», – деді СІМ басшысы.
Өз сөзінде, Александр Винокуров жобаға Astana Qazaqstan Team командасының барлық мүшесі қатысатынын, «Ізгі ниет елшісі» мәртебесін алу Париж Олимпиадасы қарсаңында рухты көтеріп, жеңіске деген сенім-күшті арттыратынын айтты.
Шығармашылық интеллигенция атынан сөз сөйлеген Динара Тілендиева артылған сенім үшін алғысын білдіріп, еліміздің мәдениетін шетелдік жұртшылық алдында насихаттау әрқашан маңызды жұмыс бола беретінін атап өтті.
Ал Қазақстанның Еңбек сіңірген қайраткері Марат Бисенғалиев бұл шараны күтпеген жерден тосынсый болғанын айтады. «Күтпеген жерден дегенім, мұнда келу жоспарда болмаған еді. Францияға қайтар рейсті кейінге шегеруге тура келді. Бүгін Сыртқы істер министрінің қолынан «Ізгі ниет елші» атағын алып отырғаныма өте қуаныштымын. Енді бұл атақты абыроймен алып жүруге күш саламын», – деді ол.
Өнер, спорт, ғылым, медицина және басқа да салада жетістікке жеткен отандастарымызды тарту арқылы Қазақстандағы «Ізгі ниет елшілері» қызметінің сәтті халықаралық тәжірибесін енгізу еліміздің беделін нығайтып, бейбітшілік, достық және халықаралық ынтымақтастықтың негізі болатын мәдени-гуманитарлық байланысты арттыруға ықпал етеді.
Жоба елге ғана емес, шет мемлекеттерге де танымал болған әйгілі отандастарымызды тарту арқылы еліміздің оң имиджін әрі қарай қалыптастыру, танымалдығын арттыру және заманауи Қазақстанның жетістіктерін дәріптеуге бағытталған. Жоба ЮНЕСКО, ЮНИСЕФ, БҰҰДБ секілді бірқатар БҰҰ жүйесінің халықаралық институттарының қазіргі қолданыстағы номинацияларына ұқсас жасалған.
Іс-шара барысында Қазақстанның «Ізгі ниет елшілеріне» олардың елші екенін растайтын Qazaqstan for Peace төсбелгісі, сертификаты мен куәлігі тапсырылды.
Наурызбек САРША