Өскемен қаласының екі тұрғыны сепаратистік әрекеттерді насихаттағаны үшін 5 жылға бас бостандығынан айырылды, – деп хабарлайды Aikyn.kz.
ШҚО прокуратурасы баспасөз қызметінің мәліметіне сүйенсек, екі азамат ұлттық және әлеуметтік араздықты қоздыратын жарияланымдар жасап, үгіт-насихат жүргізген.
«Тергеу барысында олардың 2024 жылдың ақпан айында интернет-ресурстарды (чат-рулетка) пайдаланып, Шығыс Қазақстан облысын Қазақстаннан бөлу мақсатында референдум өткізу қажеттігі туралы ойын білдіргені белгілі болды. Референдумда оң нәтижеге қол жетпеген жағдайда облысты күштеп басып алу қажеттігін насихаттаған», – деп хабарлады ведомстводан.
Өскемен қалалық № 2 сотында қаралған сот ісінде айыпталушылар өз кінәларын толық мойындап, өкінетінін жеткізді.
«Сот үкімімен сотталушылар 5 жылға бас бостандығынан айырылды. Сот үкімі заңды күшіне енді. Мемлекеттің қауіпсіздігі мен тұтастығын қамтамасыз ету мәселелері құқық қорғау және арнайы органдардың ерекше бақылауында», – делінген хабарламада.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.