Павлодар қаласының №1 ауруханасы 2002 жылы туған жас жігіттің қайтыс болғанын нақтылады. Ол өзін-өзі табельдік тапаншамен атып, жарақаттаған болатын. Aikyn.kz бұл туралы Kazinform агенттігіне сілтеме жасап хабарлайды.
Павлодар облысының Ертіс ауданында жас полицей өзін-өзі табельдік тапаншамен ауыр жарақаттағанын, жедел жәрдем оны жансақтау бөліміне жеткізгені туралы бұған дейін хабарланған болатын.
Өкінішке қарай, Павлодар қаласының 1 ауруханасының дәрігерлері 2002 жылғы туған жігіттің өміріне араша түсе алмады. Ер адам есін жимастан жансақтау бөлімінде көз жұмған. Бұл ақпаратты аурухана басшылығы нақтылады. Өңірлік Полиция департаментінің баспасөз қызметі қазіргі уақытта аталған факті бойынша тергеу жүргізіліп жатқанын айтты.
«Аталған оқиға бойынша тергеу жүргізіліп жатыр. Істің мән-жайы мен себебі анықталады. Қазіргі уақытта полиция қызметкері жансақтау бөлімінде», – деп хабарлады Полиция департаменті бастығының орынбасары Сафуан Жампейісов.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.