Қазақстанның екінші, әлемнің 35-ракеткасы Юлия Путинцева Уимблдон турнирінің төртінші айналымына өтті, – деп хабарлайды Aikyn.kz Kazinform агенттігіне сілтеме жасап.
Қазақстандық теннисші үшінші айналымда әлемнің 1-ракеткасы, поляк қызы Ига Швентекке тап келді. Осыған дейін Путинцева Швентектен бір сет басым түсіп көрмеген еді.
Бұл жолы бірінші партияда Ига шеберлік танытты – 6:3. Есесіне екіншісінде қазақстандық спортшы күш алып кетті – 6:1. Содан кейін үшінші, шешуші сетте де 4:0 есебімен алға озды. Ақыры үшінші матчболын пайдалана білді – 6:2.
Екі сағатқа созылған тартысты бәсеке барысында Путинцева эйс жасамағанымен, 8 брейк-пойнттың тең жартысын мүлт жіберген жоқ. Швентек 5 эйс, 1 брейкпен (8 брейк-пойнт) көзге түсті.
Юлия Путинцева ширек финалға шығу үшін әлемнің 14-ракеткасы, латвиялық Елена Остапенкомен таласады.
Жасөспірімдер арасында Уимблдон жарысын қазақстандық Соня Жиенбаева жеңіспен бастады. Ол ұлыбританиялық Брук Блекті жолдан тайдырды – 6:3, 3:6, 6:3.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.