Осыдан біраз жыл бұрын, ел аумағындағы казиноларға тыйым салынып, мұндай орындар сол кездегі Қапшағай (қазіргі Қонаев) және Бурабайда ғана жұмыс істейтіндігі туралы шешім шығарылған болатын. Сонан бергі кезеңде осы екі аймақта казинолар салынып, ойын бизнесі біршама өркендеді. Бірақ еліміздің басқа өңірлері құмар ойындарынан мүлде тазарды деп айтуға келмейді. Оңай пайданың дәмін татып қалғандар түрлі жолды ойластырып, құмарпаздың қалтасын қағуды жалғастыруда. Соған сай қазір құмар ойынның құрығына түскендердің саны көбейе түскен. Бұған казинолардан бөлек, онлайн ойындармен бірге букмекерлік кеңселердің де дәуірі жүріп тұрғаны кері әсер етіп отырғаны анық. Осынау қоғамды ірітетін дерттің алдын алуға, қарсы күресуге тиісті жауапты мемлекеттік ұйымдар нақты шараларды қабылдауда. Бұл бағытта Алматы облысында да жүйелі жұмыстар жүргізілуде.
Жоғарыда айтып өткеніміздей, ел заңнамасына сәйкес, ойын бизнесі объектілері Алматы облысында Қапшағай су қоймасының жағалауында және Ақмола облысының Бурабай ауданында жергілікті атқарушы органдар айқындайтын аумақтар шегінде орналастырылуға және өз жұмыстарын осы аймақтарда ғана жүзеге асыруға тиісті. Бұлардан басқа жерлерде орналасқан казинолар, ойын автоматтары, тотализаторлар заңсыз болып табылады. Осы орайда, Алматы облысы бойынша Экономикалық тергеп-тексеру департаменті заңсыз ойын бизнесі объекттерімен жоспарлы жұмыс жүргізіп отырғанын айта кеткен жөн. Департаменттегілердің айтуынша, аталған бағытта қолға алынған шаралар нәтижесінде 2022-2024 жылдар аралығында 50 заңсыз ойын мекемесінің жұмысы тоқтатылып, олардан 100-ден аса ойын терминалы, покер үстелдері және компьютерлер тәркіленіпті.
«Біз интернет-кеңістіктің тұрақты мониторингін жүргізіп отырамыз. Өйткені соңғы уақытта заңмен тыйым салынған онлайн-құмар ойындар ұйымдастыру кеңінен тарала бастағаны байқалады. Зерттеу барысында екі мыңнан астам заңсыз контент сайттар анықталды, оларды бұғаттау үшін тиісті мәліметтер уәкілетті органға жіберілді», – деген Алматы облысы бойынша экономикалық тергеп-тексеру департаменті басшысының орынбасары Данияр Қыдыралиевтың айтқанына қарағанда, олардың арасында аса ірі «1WIN» онлайн-казиносының заңсыз қызметі де әшкереленген. Аталған казиноның айналымы 6 млрд теңгені құрапты. Сонымен бірге елімізде құмар ойынның қарқынды жұмыс істеуін шетелдіктер қамтамасыз етіп отырған көрінеді. Қазір тергеу жалғасуда, онлайн-казино сайты бұғатталып, төрт ұйымдастырушыға халықаралық іздестіру жарияланған, тәркіленуге жататын мүлікке және жалпы сомасы 1,5 млрд теңге ақшалай қаражатқа тыйым салынып, Mercedes-Maybach S500 және Lamborghini Huracan маркалы қымбат автокөліктер тәркіленген.
Болат АБАҒАН,
Алматы облысы