Референдумнан соң қабылданған заңдық өзгерістер мен толықтыруларға сай болашақ иесі балалар мен жастар тәрбиесіне жете мән беруге қатысты нақты бағдарламалар қолға алынуда. Соның ішінде ерекше қажеттілігі бар балалардың қатарынан қалмауын қамтамасыз етуге байланысты маңызды істер атқарылуда. Осындай шарапатты шаралар мен игілікті шаруалар арқасында сырт көмекті қажет ететін жеткіншектер әлеуметтік тұрғыдағы жан-жақты қолдауларға ие болып жатыр.
Былтыр жазда Жетісу облысында Панфилов ауданындағы облыс әкімінің резиденциясы балаларды оңалту орталығына айналғанын, Алакөлдегі резиденцияның демалыс лагері болып қайта құрылғанын жазған едік. Биыл сол суы шипалы Алакөлдің жағасындағы Ақши ауылында орналасқан, ерекше қажеттілігі бар балаларға арналған «Жансая» жазғы сауықтыру лагерінде жазғы маусым басталғалы 103 бала тегін демалып қайтты. Жалпы, осы маусымның соңына дейін мұнда облыстың әр түкіпірінен келген 170-ке жуық бала демалады деп жоспарланған.
Былтыр Алакөл ауданы әкімдігінің бұрынғы резиденциясының ғимаратына жөндеу жұмыстары жүргізіліп, 6-18 жас аралығындағы мүгедектігі бар балаларға арналған 40 орындық «Жансая» жазғы сауықтыру лагері өз жұмысын бастаған еді. Лагерьде балаларды оңалтуға барлық жағдай жасалған. «Алакөл көлінің жағалауындағы белсенді демалыс жеткіншектерді сауықтырумен қатар, оларды әлеуметтендіруге оң ықпалын тигізеді», – дейді осындағы өз ісінің білікті мамандары.
Былтыр жазғы кезеңде бұл лагерь заңды өкілдерімен бірге 127 баланы қабылдаса, биыл демалатын балалардың саны 170-ке жуықтайды.
– Әр бала 5 күннен демалады. Демалушыларды қабылдау I-ІІІ топтағы мүгедектігі бар баланың тіркелген жері бойынша дәрігердің ұсынысы немесе қорытындысы негізінде жүзеге асырылады. Баланы орталыққа жеткізу барысында демалушының заңды өкілі немесе еріп жүретін адамы жеткіншекті тұрғылықты жерінен Үшарал қаласына дейін апарады да, одан әрі оларды Ақши ауылына, лагерьге жеткізуді орталықтың өзі мойнына алады, – деді облыстық Жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаев.
Лагерьде сауықтыру шараларын қабылдап жатқан балалардың ішінде былтыр болғандары да бар екен. Олардың айтуынша, сол кездегі демалыс көңілдерінен шыққан. Сондықтан биылғы жазды асыға күткендерін жасырмайды.
«Біз қызымыз екеуміз Сарқан қаласынан екінші жыл қатарынан келіп отырмыз. Мұнда ерекше қажеттілігі бар балаларды оңалтуға барлық жағдай жасалған, қызметкерлері де мейірімді. Әр жастағы балаларға жеке бағдарламалар ойластырылған. Көлдің суы шипалы. Қызым басқа балалармен де араласып, достасып кетті. Мұның бәрі оның денсаулығына оң әсерін тигізіп жатыр», – дейді Анастасия Мацкова.
«Маған лагерь ұнады. Осы жерден өзіме көп дос таптым. Біз көлдің суына түсеміз, сурет саламыз, билейміз. Демалыс көңілді өтіп жатыр. Келесі жылы тағы да келгім келеді», – дейді 10 жасар Ералы Салам.
Жалпы, Жетісу облысында балаларға тегін оңалту қызметін көрсететін 6 орталық бар. Оның бесеуі Жетісу облысы құрылғаннан бері іске қосылды. Сонымен қатар биыл республикада бірінші болып Талдықорған қаласында 18 жастан асқан мүгедектігі бар азаматтарға арналған стационар орталық ашылды.
Болат АБАҒАН,
Жетісу облысы