Осыған орай Ұлытау облысы Мәдениет, тілдерді дамыту және архив ісі басқармасының Ресурстық тілдерді дамыту орталығының ұйымдастыруымен «Ұлт ұстазы – Ахмет Байтұрсынұлы» тақырыбында жалпыоблыстық дәріс ұйымдастырылды.
Дәрістің басты мақсаты қазақ тіл білімінің негізін салушы, ұлттық мәдениет пен әдебиеттің бастауында тұрған рухани көсем, Алаш қозғалысы көшбасшысы Ахмет Байтұрсынұлының сан қырлы бейнесінің рөлі мен маңызын таныстыру, жастарға ақын өмірін үлгі ете отырып, танымдық деңгейлерін дамыту болды. Іс-шараға оқу орындарының студенттері мен оқытушылары қатысты.
Дәрісті қазақ тілі мен әдебиеті пәнінің жоғары санатты ұстазы, магистр Ержан Құрмашұлы оқыды. Дәріс барысында жастар Алаш көсемі жайлы слайд көріп, көкейде жүрген сауалдарына жауап алды.
Сонымен қатар мемлекеттік тілді насихаттау, мемлекеттік тілдің мәртебесін көтеру, оның қолдану аясын кеңейту, қазақша интеллектуалды орта құру, қазақтың тарихын, сал-дәстүрін, әдет-ғұрпын, ғылымын, өнерін, әдеби мұраларын насихаттау, ұстаздар қауымымен жұмыс істеу дағдыларын арттыру арқылы зияткерлік ортаға үлес қосу мақсатында Ресурстық тілдерді дамыту орталығы ұйымдастыруымен Қазақстан халқы тілдері күні мерекесіне орай облыстың мектеп мұғалімдері арасында «Қазақша Quiz» зияткерлік сайысы да жоғары дәрежеде мәреге жетті.
Іс-шараға облыстың Жезқазған, Сәтбаев, Қаражал қалаларынан, Жаңаарқа және Ұлытау аудандарынан бір-бір топтан, барлығы 5 топ қатысты.
Ресурстық тілдерді дамыту орталығының басшысы Ержан Көшербаев қонақтарды Қазақстан халқы тілдері күні мерекесімен құттықтап, қатысушыларға сәттілік тіледі.
Quiz «Тіл-қазына», «Ұлы дала тұлғалары», «Салт-дәстүрім – қазынам», «Тарихым – түп қазығым», «Мақал-мәтел – ой көмбесі», «Әртүрлі тақырыптар» деген атаумен 6 кезеңді қамтыды.
Айта кету керек, қатысушылар әр кезеңде 6 сұрақтан 36 сұраққа жауап берді.
Қазақша Quiz зияткерлік сайысына қатысушы топ мүшелері өз білімдерін, танымдық деңгейлерін көрсете білді. «Жүйріктен жүйрік озар жарысқанда», демекші, әділқазылар алқасының шешімімен тартысты өткен сайыс қорытындыланды.
Жезқазған қаласының «Зейін» тобы І орын алса, Ұлытау ауданының «Қазына» тобы ІІ орынға табан тіреді. Ал Қаражал қаласының «Архимед» тобы ІІІ орынды еншіледі.
Барлық қатысушыға алғысхат табысталды.
Тағы да бір мерекелік шара, Жезқазған қаласының 70 жылдығына орай өткен «Ақындарым – ақиқаттың айнасы» атты кездесу кеші де көрермен жинады.
Кештің мақсаты мемлекеттік тіл саясатын насихаттау, ана тіліміздің қоғамдағы белсенділігін арттырып, қолданыс аясын кеңейту, мәртебесін көтеру болатын.
Кездесуге облыстың әр өңірінен қарымды қаламгерлер мен жас қалам иегерлері шақырылды. Мұса Тілеуұлы мен Мұқанбетқали Сейтқазы бастаған ақындар тобы өздерінің қалаға арнаған және жыр қоржындарындағы басқа да өлеңдерімен бөлісті.
«Тілге құрмет – елге құрмет» деген қағидатты ұстанған Ұлытау облыстық Ресурстық тілдерді дамыту орталығы алдағы күндері де осындай игілікті шараларды қолға алмақшы.
Әдебиет БЕЛГІБАЙҰЛЫ,
Ұлытау облысы