"Ақ жол" партиясы Дмитрий Васильевтің ұсталуына қатысты мәлімдеме жасады, – деп хабарлайды Aikyn.kz.
Өткен аптада 2023 жылы Ұлттық гвардияның лауазымды тұлғасының пара алу ісі бойынша ҰҚК партия төрағасының орынбасары Дмитрий Васильевті ұстағаны туралы бейресми ақпарат тарады.
"Апта сайын дерлік шенеуніктер мен олардың сыбайластарының ұсталғаны туралы хабарлар жарияланғанымен, әдетте олардың партияларға қатыстылығына ешкім назар аудармайды. Ал дәл осы мәселеде ақпарат саяси тұрғыдан көрсетіліп берілген, алайда бұл қамауға алудың Д.Васильевтің партиядағы қызметіне еш қатысы жоқ", – делінген ақпаратта.
Партияның баспасөз қызметінің хабарлауынша, Д.Васильев шынымен де партия төрағасының ірі бизнеспен жұмыс жөніндегі орынбасары. Ол түрлі салада бірнеше жобаны жүзеге асырып жүрген ірі кәсіпкер әрі инвестор.
Ол партияда қоғамдық (штаттан тыс) жұмыс істеп, тек ұйымдастыру шараларына келетіндіктен, бізде оның партиядан тыс іскерлік қызметі мен ұсталуының мән-жайы туралы толық мәлімет жоқ.
Жоғарыда аталған хабарламалар пайда болған соң, өткен жұмада (6.09) партия төрағасы мән-жайды түсіндіріп, Д.Васильевтің адвокатының мәліметтерін беруді сұрап, Ұлттық қауіпсіздік комитетіне ресми сауал жолдады.
"Кеше (10.09) оның ұсталу фактісін растайтын жауап келіп, адвокаттарының мәліметтері берілді. Біздің заң қызметіміз шағымдардың мәнін түсіну үшін жақын арада олармен байланысады (әзірше, мұндай шаралар жауапсыз қалып отыр). Құқық қорғау органдарының сыбайлас жемқорлықты жою жөніндегі жұмысын түбегейлі қолдай отырып, кез келген құқық бұзуға қарсы күресте әділдік пен құқықтық мемлекет қағидаттарын басшылыққа алу маңызды деп есептейміз
Сонымен қатар әзірше нақты ешбір ақпарат болмаса да, бірқатар фактілерді түсіну қажет. Мысалы, Д.Васильевке Қылмыстық кодекстің 367-бабы тағылып отыр (лауазымды тұлғаға пара беру), алайда бізге нақты мән-жайлар белгісіз, мысалы, Д.Васильев пара алудың бастамашысы болды ма, әлде, керісінше, тұлғаның бопсалау құрбаны ма?
Бұл жайттың шешуші маңызы бар, себебі сол ҚР ҚК-нің 367-бабына сәйкес «Пара берген адам, егер оған қарсы пара бопсалау орын алса, қылмыстық жауапкершіліктен босатылады».
Әрине, қамауға алу фактісінің өзі тергеу тарапынан Д.Васильевке қатысты маңызды талаптың бар екенін көрсетеді", – делінген мәлімдемеде.
Бұл ретте биыл көктемде «Ақ жол» фракциясының депутаттық сауалынан кейін Қарағанды облысындағы "Қазтеміртранс" АҚ шенеуніктеріне бірнеше жыл бойы пара беруге мәжбүр болған 15 кәсіпкер айыптауға қарамастан, Қылмыстық кодекстің дәл осы бабының негізінде сот залында босатылғанын мысал ретінде келтіруге болады (https://t.me/peruash/11056 ).
"Өзге де бізге белгісіз жағдайлар болуы мүмкін, сондықтан Д.Васильевке қатысты жағдай адвокаттарының мәселені егжей-тегжейлі зерттеуін талап етеді, олармен жақын арада байланысамыз деп үміттенеміз. "Ақ жол" демпартиясы тағылып отырған айыптаудың ауырлығын ескере отырып, Д.Васильев ісі бойынша тергеу мен соттың барынша ашық болуына мүдделі. Алайда ҰҚК жауабында айтылғандай, бұл іс бойынша ақпарат алуға белгілі бір шектеу бар", – делінген ақпаратта.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.