KAZ Minerals тобы Абай облысындағы Орлов шахтасында болған қайғылы оқиға туралы хабарлады, деп жазды Aikyn.kz.
19 қыркүйекте шамамен сағат 14:20-да Орлов шахтасында кәсіпорынның 2 жұмысшысы жарақат алған еді. Оған тау-кен массасының опырылуы себеп болған.
Алған жарақаттардың салдарынан зардап шеккендердің бірі ауруханада қайтыс болды. Екінші жұмысшы медициналық көмек көрсетілгеннен кейін үйіне қайтты.
- Оқиғаның мән-жайы мен себептері анықталып жатыр. Қайғылы жағдайды тергеу бойынша арнайы комиссия құрылды. KAZ Minerals тобы директорлар кеңесінің төрағасы Олег Новачук жазатайым оқиғаны тергеуге қатысу үшін өңірге барды, - делінген хабарламада.
KAZ Minerals тобының басшылығы мен ұжымы марқұмның туыстары мен жақындарына қайғыра көңіл айтады. Компания қаза тапқан жұмысшының отбасына жан-жақты көмек көрсетеді.