Мемлекет басшысы Ұлттық құрылтайда кітап оқу мен кітап шығарудың ел болашағы үшін маңызына тоқталып, «Шын мәнінде кітап оқитын ел зиялы ұлтқа айналады» деп атап өткен болатын. Кешегі өткен ауқымды шараның осындай зиялы ұлт болып қалыптасуымызда ықпалы зор. Сонымен қатар фестиваль жас ұрпақтың әдебиетке деген қызығушылығын арттырып, қоғамда ақпараттық мәдениетті қалыптастырады. Айта кету керек, «KitapTime – 2024» жазушылар мен оқырман үшін қарым-қатынас алаңын құру мақсатында ұйымдастырылды. Ұлттық академиялық кітапхана басшысы Ғазиза Құдайбергенқызы фестивальдың өткен жылдардағыдан айырмашылығы ретінде екі жобаны атап өтті.
«KitapTime – 2024» фестивалінің басты ерекшелігі мыналар: биыл Air Astana әуекомпаниясымен ынтымақтастық туралы меморандумға қол қойдық. Нәтижесінде, әуекомпания ұшағында ұшу кезінде жолаушыларға тыңдау үшін қызықты ұлттық аудиоконтент ұсынылады. Әуекомпанияның медиақұрылғыларына 25 контент бердік. Оның бәрі авторлық құқыққа ие. «Мәдени мұра» бағдарламасы аясында «Батырлар жыры» шығып еді ғой. Бұл халықаралық ұйым болғандықтан, әр жырдың орындаушысын атап көрсеттік. Одан бөлек, «Абай жолын» да енгіздік. Мүмкіндігінше бұл шығармалардың сипаттамасын екі тілге, ағылшын және орыс тілдеріне аударма жасадық. Кітапханамызға арнайы келген Air Astana әуекомпаниясының вице-президенті осындай әдеби-мәдени ұсыныстың бірінші рет түскенін айтқан.
Ал екінші ерекшелігі – QR-әдебиеттердің орнатылуы. Бұл бастаманы республика көлемінде жүзеге асыруды ұсынып отырмыз. Электронды кітапханада бар кез келген авторлық кітапты қабырғаларға жабыстырып орналастыра берсек болады. Оны 9 бағыт бойынша ұйымдастырдық: балалар әдебиеті, ауыз әдебиеті, көркем әдебиет, Қазақстан тарихы, нон фикшн және тағы басқалары. Мұндай QR-әдебиеттерді кез келген мекемеге, аурухана болсын, әуежай не вокзалдарға орнатуға болады, – деді Ғ. Құдайбергенқызы.
«KitapTime - 2024» ІІІ республикалық кітап фестивалі аясында «Арман-ПВ», «Қасым», «Мұқаба», «Мазмұндама», Qazbilim, «Отбасы хрестоматиясы», Qyr balasy, Steppe&World баспалары, Кіtapal, «Абай», «Эльдорадо», «Кітап хадия» кітап дүкендерінің қатысуымен кітап жәрмеңкесі, сондай-ақ елшіліктердің ұйымдастыруымен кітап көрмесі өтті. Одан бөлек, «Ауыл кітапханаларына 100 кітап» әлеуметтік акциясына қолдау көрсетті.
Айта кетейік, бұл күні республиканың барлық аймағында кітапханадағы кітап пен кітапқұмарларды біріктіретін кітап мерекесі өтті. Мәдени шараны мемлекет және қоғам қайраткерлері, елшілік өкілдері, ақын-жазушылар, суретшілер, иллюстраторлар, блогерлер, БАҚ өкілдері, оқырмандар, елорда тұрғындары мен қонақтары тамашалап, фестиваль қонақтары кітап сыйға тарту рәсіміне қатысты.
Сымбат БАУЫРЖАНҚЫЗЫ