Осы орайда Жетісу облысында жыл сайын мыңдаған жан баспаналы болып жатқанын айта кеткен жөн. Тұрғын үйлер салу қарқыны биыл да жоғары деңгейде. Жыл соңына дейін өңірдегі 4 мыңнан астам тұрғын қоныстойын тойлайды деген батыл жоспар бар. Егер бұл меже орындалса, онда облыс бойынша үй кезегінде тұрғандар саны бірден 14 пайызға азаяды. Ол үшін келер жылға дейін өңірде 350 мың шаршы метрге жуық тұрғын үй тұрғызылуға тиісті.
Биылғы 8 айда облыста 150,2 мың шаршы метр тұрғын үй пайдалануға берілген. Қыркүйекке дейін пайдалануға берілген баспаналар жыл соңына дейінгі жоспардың 43%-ын құрайды. Сондай-ақ халықтың әлеуметтік осал топтарынан кезекте тұрғандар үшін 866 жалдамалы пәтер сатып алуға 13,4 млрд теңге бөлінген. «Самұрық-Қазына» АҚ есебінен 560 пәтерлік 9 тұрғын үй салынуда. Барлығы жоспарға сай жүзеге асса, жыл соңына дейін 4 мың 117 пәтерде қоныстойы тойланады.
Үйлі болу қуанышына кенелетіндер қатарында облыстың барлық аудан-қалаларының тұрғындары бар. Солардың арасында соңғы жылдары тұрғын үй мәселесі өте күрделі жағдайда екені аталып жүрген Кербұлақ ауданының орталығы Сарыөзек ауылында үлкен істер атқарылып жатқанын айта кеткен жөн. Күні кеше тоғыз жолдың торабында орналасқан ірі елдімекенде 60 пәтерлік жалға берілетін тұрғын үй халық игілігіне тапсырылды. Жылдар бойы кезекте тұрғындар мен тозығы жеткен екі қабатты үйлерде тұрып торыққандардың және әлеуметтік осал топтағылардың арасынан бірден 60 отбасы үйлі атанды. Солардың ішінде болған, мүгедек жеткіншегін қоса алғандағы бес баланы бағып-қағып отырған көпбалалы ана Татьяна Кузинаның қуанышында шек жоқ.
– Баспаналы болғаныма, қолыма пәтер кілтін ұстап тұрғаныма әлі де сене алар емеспін. Осынау қуанышты сәтті өте ұзақ күттік. 8 жыл кезекте тұрдық. Енді, міне, өз үйіміз бар. Бұл – отбасымыз үшін үлкен бақыт, зор қолдау. Үш бөлмелі пәтеріміз жарық әрі кең. Енді балаларым да алаңсыз ойнап-күліп, сабақтарын оқитын болды, – дейді батыр ана.
Ауылдасымен қоса қуанған сарыөзектік тағы бір тұрғын да өздерінің жағдайына түсіністікпен қарап, жанашырлық танытқан мемлекетке алғысын жеткізуге асықты.
– Ерекше күтімді қажет ететін балам бар. 2015 жылдан бері кезекте тұрамыз. Жалдамалы пәтерде көшіп-қонып жүру бізге ауыр тиетін. Міне, бүгін көптен күткен пәтерге қол жеткіздік. Ұлымның өз бөлмесі болады. Қазіргі қуанышымды, бақытымды сөзбен айтып жеткізу мүмкін емес. Әр шаңыраққа осындай баспана нәсіп етсін, – деген Гүлмира Қасымованың толқынысын да түсінуге болады.
Кербұлақ ауданы әкімдігінің мәліметінше, мемлекеттік тұрғын үй қорынан баспана алу кезегінде 1 600-ден астам тұрғын тіркелген. Қазіргі кезде ауданда осы мәселені шешудің барлық мүмкіндіктері қарастырылуда. Күні кеше пайдалануға берілген 60 пәтерлі тұрғын үйден бөлек, жыл соңына дейін халықтың әлеуметтік жағынан осал санатындағы тағы 100 отбасы баспаналы болмақ. Олар үшін ауданның әр ауылдық округтерінен жаңа жеке үйлер сатып алынуда. Қазірге дейін 17 үй сатып алыныпты. Тағы 50 үйді қазан айында, қалған 33 үйді қараша айында алу жоспарланған. Осылайша, жыл соңына дейін ауданда тұрғын үй кезегі 4,4 пайызға қысқарады. Яғни, баспана кезегіндегі адамдар саны 1 467 адамға дейін азаяды. Сонымен қатар алдағы кезде тағы екі 60 пәтерлі тұрғын үйдің құрылысын аяқтау жоспарланған. Оның бірі, «Самұрық-Қазына» АҚ қаражаты есебінен салынып жатқан жалгерлік үй болса, екіншісі, тозығы жеткен үйлердің тұрғындары үшін тұрғызылуда.
Болат АБАҒАН,
Жетісу облысы