Екі күнге жалғасқан конференция аясында күрделі жағдайларды тәжірибе жүзінде көрсететін шеберлік сағаттары, операция залынан онлайн трансляция курстары, дөңгелек үстелдер мен тақырыптық секциялар ұйымдастырылды. ПІБ МО ауруханасы және Үндістан, Түркия ауруханаларының операциялық залдарынан тікелей трансляция тарады. Биыл екінші мәрте өтіп жатқан форумға 2 мыңға жуық дәрігер келсе, 4 мыңға жуық маман онлайн қатысты. Олар жалпы хирургия, урология, проктология, гинекология, кардиохирургия, нейрохирургия, қантамыр хирургиясы, интервенциялық хирургия, аритмология, оториноларингология, офтальмология сынды ересектер хирургиясының барлық бағыты бойынша талқылау өткізіп, тәжірибе алмасты.
Конференцияның алғашқы күні ПІБ МО ауруханасы мен Қытайдың Xuanwu Hospital серіктестік туралы меморандумға қол қойды. Меморандум аясында екі елдің клиникалары нейрохирургия саласында клиникалық, ғылым және білім беру бойынша тәжірибе алмасып, серіктестік орнатты. Сондай-ақ осы құжаттың арқасында эпилепсия ошағын анықтайтын Remebot роботы Қазақстанның барлық өңірінің медицина мекемелерінде қолданылатын болады. ПІБ Медициналық орталығы ауруханасы директорының хирургия бойынша орынбасары Мыңжылқы Бердіқожаевтың айтуынша, жаңа құрылғының науқастарды емдеуде әлеуеті зор.
– Әрине, операцияны роботсыз да жасай беруге болады, бірақ ол ұзақтау өтеді. Аталған стереотактикалық құрылғы адам басына орнатылып, бас сүйегіндегі 13 тесік арқылы электродтарды қондырып, 3-4 күнде эпилептикалық ошақтың қай жерде екенін анықтауға мүмкіндік береді. Осы арқылы тек сол жерді күйдіріп, науқасты емдеп, сауықтырып жіберуге болады. Бұл технология қазір Президент іс басқармасы медициналық орталығы ауруханасының Эпилептология орталығында қолданылады. Келер жылдан бастап әр аурухана мүмкіндігі болса осы роботты сатып алып, қолдана алады, – дейді нейрохирург М.Бердіқожаев.
Сондай-ақ дәрігерлер кардиохирургия, нейрохирургия және қантамыр хирургиясы бойынша 6 пациентке тікелей эфирде операция жасаса, оны форумға жиылған мамандар бірге талқылады. Германиядан келген нейрохирург, профессор Данэль Хенги келешекте елдегі білікті дәрігерлермен тығыз әріптестік байланыс орнатқысы келетінін жеткізді.
– Бүгін мен нейрохирургиялық секцияға қатыстым. Әлемнің түкпір-түкпіріндегі әріптестермен тығыз байланыста болып, білгенімізді бөлісіп отыру аса маңызды деп ойлаймын. Бұл ғылым, нейроғылым және инновация үшін керек. Мен осындай форумдарға келгенде әріптестерімді, олардың жұмысындағы қызықты жағдайларды естіген сайын жаңа нәрсе үйренемін. Іс-шара өте жоғары деңгейде ұйымдастырылған. Осындай тамаша конференцияның мүшесі болғаныма қуаныштымын. Қазақстан, Астана ұнап жатыр. Болашақта әріптестеріммен тығыз байланыста болғым келеді, – дейді профессор.
Ал Қазақстанға екінші рет ат басын тіреген мысырлық нейрорадиолог-дәрігер Ахмад мырза 2019 жылмен салыстырғанда елдегі медицина әлдеқайда ілгерілегенін айтты.
– Менің нейрорадиология саласында жүргеніме 20 жыл болды. Конференцияда «Механикалық тробоэктомия дәрежесі және АҚШ-тағы жүректің жедел ишемиялық ауруларын емдеу тәсілдері» тақырыбында баяндама жасадым. Дәрігерлер ишемиялық ауруларды дер кезінде анықтап, емдеуі үшін бірінші кезекте оның қандай күрделі ауру екенін түсінуі маңызды. Осы туралы айттым. 2019 жылы Мыңжылқы Сайлауұлымен бірге Алматыдағы орталықта болған едім. Сол кезеңмен салыстырғанда қазір сіздерде медицина жоғары деңгейде екенін, бір орында тұрып қалмай, дамып жатқанын көрдім, өзгерісті байқадым, – деді ол.
Мамандар соңғы жылдары елімізде ядролық медицина мен ядролық технологияның дамуы әлем елдерінің қызығушылығын тудырып отырғанын айтады. Сондай-ақ қазір еліміздің медицинасы ядролық технологиялар негізінде радиофармацевтикалық препараттарды диагностикада да, емдеу шараларында да сәтті қолданып жүр. Ал халықаралық ғылыми-практикалық форумдар дәрігерлердің біліктілігі мен білімін арттыруда маңызы зор. Мәселен, ғылыми тәжірибе алмасу барысында мамандар «Эндоскопия», «Оториноларингология, офтальмология», «Ортопедия», «Урология», «Кардиохирургия» секілді бірнеше секцияға бөлініп, операция барысындағы түрлі тосын жағдайларда қалай әрекет ету керегін бірлесіп талқылады.
Тілекгүл ЕСДӘУЛЕТ