Жобаның мақсаты – діни саладағы өзекті мәселелерді талқылау, аталған бағытта ақпараттық түсіндірме жұмыстары мен түрлі шара ұйымдастыру, өңірдегі діни мәселелерді шешуге ықпал ете отырып, имамдардың үйлесімді қызмет атқаруын қамтамасыз ету, сондай-ақ деструктивті діни идеологияның алдын алу, теріс бағытта жүрген азаматтарға тиісті негіздермен түсіндіріп бере алатын білікті имамдар корпусын қалыптастыру.
Жобада Жетісу облысы аумағындағы ҚМДБ мешіттерінде қызмет атқаратын 40 дін қызметкері екі апталық курстан өтті. Курста IHSAN ғылым және мәдениет орталығының төрағасы, РАТТ мүшесі, теология ғылымдарының PhD докторы Тимур Нүсіпханов, Жетісу университетінің профессоры, PhD докторы Бибігүл Әлмұхамбетова, Жетісу университетінің аға оқытушылары Венера Еңсеева және Динара Әшімова, НМУ профессоры, PhD докторы Алау Әділбаев, әл-Фараби атындағы ҚазҰУ аға оқытушылары Мәрия Майлықұтова және Темур Аманқұл дәріс оқыды.
Жетісу облысында 11 конфессияға тиесілі 258 діни бірлестік және олардың филиалдары қызмет атқаруда, оның ішінде 206-сы – ислам, 17-сі – орыс-православ, 3-еуі – рим-Католик, 30-ы – протестантық, 1-еуі – Йегова куәгерлері, сондай-ақ 1-еуі – Бахаи қауымдастығы. Барлығы 319 діни қызметкер бар.
Қатысушыларға арнайы дайындалған ақпарттық үлестірмелі буклеттер берілді. Маңызды әрі мазмұнды ақпараттар талқыланған он бес күндік семинарға қатысушылар қызықты және ғибратты мағлұматтарға қанығып қайтты.