Ғұмарбек Дәукеев атындағы Алматы энергетика және байланыс университетінде Қазақстанда АЭС салу туралы республикалық референдумның алдын ала қорытындыларын сараптамалық талқылау өтті. Іс-шараға Орталық Азиядағы new Nuclear Watch Institute консультациялық кеңесінің төрағасы Бауыржан Ибраев, «AMANAT» партиясының Алматы қалалық филиалы төрағасының орынбасары Қуаныш Төлепов, сондай-ақ атом ғылымы саласындағы жетекші сарапшылар, профессор-оқытушылар құрамы және Студент жастардың өкілдері қатысты.
Кездесуде ҚР Орталық сайлау комиссиясы жариялаған референдумның алдын ала қорытындылары талқыланды. Мәліметтерге сәйкес, азаматтардың 71,12 пайызы немесе 5 миллион 561 мың 937 адам атом электр стансасының құрылысын қолдады.
«Атом электр стансасын салу туралы референдум еліміздің энергетикалық тәуелсіздігі мен орнықты дамуы жолындағы маңызды қадам болды. Бүгінде азаматтардың 70 пайыздан астамы жобаға қолдау білдірген кезде, біздің алдымызда құрылысты бастау ғана емес, болашақта осы күрделі, бірақ қажетті инфрақұрылымды басқаратын жас мамандарды даярлау міндеті тұр. Жастар - Қазақстанның атом энергетикасының болашағы, ал университеттер осы салада жұмыс істеу үшін қажетті құзыреттерді қалыптастыруда шешуші рөл атқарады», – деп атап өтті «Қазақстанның ядролық қоғамы» қауымдастығының ҚР атом ғылымы, энергетика және өнеркәсіп ардагерлері төрағасы Бауыржан Ибраев.
Энергетика және жасыл технологиялар институтының директоры Айнұр Бегімбетова кадрлық әлеуеттің маңыздылығын атап өтті:
«АЭС пайдалануға берілген кезде жастар дайындалуы керек. Бүгінде атом ғылымы саласындағы мамандарды оқытуға ресурстарды инвестициялау қажет, бұл біздің ғылыми базамыздың дамуына оң әсер етеді. Ол үшін арнайы бағдарламаны әзірлеу қажет. Сондай-ақ студенттерді атом энергетикасы саласы белсенді дамып келе жатқан Оңтүстік Корея сияқты елдерге жіберу мүмкіндігі болуы керек. Онда жас мамандар озық технологиялармен танысады, содан кейін оларды бізде енгізеді».
Талқылау барысында референдум өткізу Қазақстандағы саяси мәдениет пен азаматтық қоғамның дамуындағы маңызды кезең болғандығы атап өтілді. Азаматтардың осы дауыс беруге қатысуы қазақстандықтардың өз елінің болашағы үшін зейіні мен жауапкершілігінің жоғары дәрежесін айғақтайды.
«АЭС құрылысы бойынша референдум Қазақстан Президенті Қасым-Жомарт Тоқаевтың саяси бағытын жүзеге асырудағы маңызды қадам болды. Бұл дауыс беру еліміздің "Халық үніне құлақ асатын мемлекет"қағидаттарына адалдығын көрсетеді. Азаматтардың референдумға белсенді қатысуы олардың негізгі мемлекеттік шешімдерге ықпал етуге дайын екенін көрсетеді және демократиялық институттарды нығайту жолындағы маңызды қадам болып саналады. Бұл процесс халықтың саяси белсенділігін дамытуға және азаматтық жауапкершілік деңгейін арттыруға ықпал етеді», – деп атап өтті «AMANAT» партиясы Алматы филиалы төрағасының орынбасары Қуаныш Төлепов.
Естеріңізге сала кетейік, Қазақстанда 6 қазанда атом электр стансасын салу бойынша республикалық референдум өтті.