Кәсіби мерекеге орай ұйымдастырылған салтанатты жиында облыс әкімі Берік Әбдіғалиұлы, облыстық мәслихаттың төрағасы Бауыржан Шыңғысов мектептің жаны – мұғалімдерді мерекемен құттықтап, еңбектеріне табыс тіледі.
– Облысымызда балаларға тең қолжетімділікті қамтамасыз ету, білім беру нысандарын модернизациялау, материалдық-техникалық базаны жетілдіру, қауіпсіздікті қамтамасыз ету сияқты маңызды бағыттар бойынша жұмыстар жүріп жатыр.
Биыл 300 млн теңгеге 25 білім беру нысанында (2 балабақша, 22 мектеп, 1 колледж) жөндеу жұмыстары жүргізілді.
Екі жылда балаларды тасымалдауға 20 автобус сатып алынды. Интернет желісіне жоғары жылдамдықпен қолжетімділікті қамтамасыз ету үшін облысымыздың 43 мектебіне Starlink ғаламдық спутниктік жүйесі қосылды. Мұғалімдер күні – жылулықтың, мейірімнің, ұлағат пен өнегенің мерекесі. Бұл күнді барлық адам ерекше қуанышпен, ерекше құрметпен атап өтеді. Себебі барлық адамның ұстазы бар.
Қадірлі педагогтер, еліміздің өсіп-өркендеуіне қосып жүрген өлшеусіз үлестеріңіз үшін алғыс білдіремін. Ардагерлер ұстаздардың мемлекет игілігі үшін, келешек ұрпақ үшін жасаған ауқымды істеріне бүгінгі ұрпақ өкілі ретінде ризашылығым шексіз.
Ұстаз – ұлағатты есім. Шәкірттерін білім нәрімен сусындатып, тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде ұстаздың еңбегі зор. Сондықтан да ол әрдайым қасиетті тұлға ретінде ерекшеленеді. Білім көшін жылжытып келе жатқан ұстаздар қауымына құрмет арта бермек, – деді облыс әкімі Берік Әбдіғалиұлы.
Салтанатты кеште облыстың бірқатар ұстазы «Ыбырай Алтынсарин» төсбелгісімен, «Білім беру ісінің құрметті қызметкері» төсбелгісімен, «Еңбек ардагері» медалімен, Қазақстан Республикасының Оқу-ағарту министрлігінің «Құрмет грамотасымен», Ұлытау облысының «Құрмет грамотасымен» марапатты болды.
Одан бөлек, білім беру ісінде үздік көрінген сала мамандары, облыстық байқау жеңімпаздары ақшалай сыйақыларға ие болды. Атап айтар болсақ, «Үздік директор», «Үздік директор орынбасары», «Үздік әдіскер», «Қосымша білім беру ұйымының үздік педагогі», «Үздік әлеуметтік педагог», «Үздік арнайы білім беру педагогі», «Үздік кітапханашы», «Үздік психолог», «Үздік әдістемелік кабинет», «Үздік қосымша білім беру ұйымы», «Үздік музей», «Үздік мектепке дейінгі білім беру ұйымы», «Техникалық және кәсіптік, орта білімнен кейінгі білім беру ұйымы» аталымдары бойынша 150 000 теңге мен 1 000 000 теңге аралығында ақшалай сыйлықтар табыс етілді.
Іс-шара ұстаздар құрметіне алғыс концертімен жалғасын тапты.
Әдебиет БЕЛГІБАЙҰЛЫ,
Ұлытау облысы