Термалды нүктелерге мониторинг жүргізу барысында ТЖ департаментінің қызметкерлері Қостанай облысы Жітіқара ауданымен шекараға жақын Ресей аумағында өрт ошағын тіркеді, – деп хабарлайды Aikyn.kz.
Төтенше жағдайлар министрлігінің хабарлауынша, өрт тез таралып, Қазақстан аумағына өтті. Жағдайға ден қойып, Қостанай облысы ТЖД күштері мен құралдары дереу оқиға орнына бет алды.
Шекара аумағындағы жер қашықтығы, сондай-ақ жел өрт сөндіру жұмыстарын қиындатып, өрттің тез таралуына ықпал етті.
"Құтқарушылардың жедел реакциясы мен шекара қызметімен және басқа да органдармен үйлестірудің арқасында өрттің одан әрі таралуына жол бермей, Қазақстан аумағында 1400 шаршы метр аумақта өртті жедел оқшаулауға және сөндіруге мүмкіндік туды", – делінген хабарламада.
Табиғи өрттің салдарынан ешкім зардап шеккен жоқ.
Айта кетейік, Қазақстанның екі облысында – Қарағанды мен Павлодар облысында өрт сөндіріліп жатыр. Теректі ауылында жедел штаб құрылып, Қарқаралы ауданы мен Қарағанды облысының әкімдері оқиға орнында жүр.
Штаб жұмысына 386 адам тартылды. Төтенше жағдайлар министрлігі, ТЖД және басқа да департаменттер мен қызмет қызметкерлері, 64 бірлік техника, Төтенше жағдайлар министрлігі мен Қорғаныс министрлігінің тікұшағы жұмылдырылған.
Осы ретте Қарқаралы ауданының әкімі Әділжан Арғынов әлеуметтік желілерде түрлі көмек ұйымдастырып жатқандар туралы ескертті.
«Қазір әлеуметтік желіде қаржы жинау, көмек көрсету бойынша ақпарат таратылып жатыр. Жауапты адамдарсыз ұйымдастырған көмек дұрыс емес екенін ескерткім келеді. Қазіргі уақытта күш-құралдар жеткілікті. Сарбаздардың тамағы, демалатын орындары, жанар-жағармаймен толық қамтамасыз етілген», – деді Қарағанды облысы Қарқаралы ауданының әкімі Әділжан Арғынов Instagram парақшасында.
ТЖМ баспасөз қызметінің хабарлауынша, Қарағанды облысындағы Айыр, Шөптікөл, Қызылшілік, Атантай, Теректі елді мекендеріне қауіп жоқ.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.