Бұл – халықтың ой-пікірін ескере отырып саяси шешім қабылдаудың, тікелей демократияның бірден бір тетігі. Демократия – қандай да бір нәтиже емес, күнделікті түрде дәлелдеуді талап ететін «тар дәліздегі» үздіксіз процесс. Оны әртүрлі мемлекеттің даму барысынан байқауға болады. Ұзақмерзімді саяси шешімге қоғамның тартылуы жаңа саяси мәдениеттің қалыптасуымен байланысты, яғни ел азаматтарының басым көпшілігі АЭС құрылысына «иә» деген жауап бере отырып, болашаққа деген ортақ жауапкершілікпен бөлісті. «Халық үніне құлақ асатын мемлекеттің» тұжырымы жария саясатпен байланысты. Бұл жерде «тар дәліз» ұғымын белгілі экономистер Д.Аджемоглу мен Дж. Робинсонның The Narrow Corridor: States, Societies, and the Fate of Liberty атты еңбегіне сүйеніп отырмын.
Қазақстан Республикасының 1995 жылғы 2 қарашадағы №2592 «Республикалық референдум туралы» конституциялық заңының 1-бабына сәйкес «Республикалық референдум – Қазақстан Республикасы Конституциясының, конституциялық заңдарының, заңдарының және мемлекеттiк өмiрiнiң өзге де неғұрлым маңызды мәселелерiне арналған шешiмдердiң жобалары бойынша бүкiлхалықтық дауыс беру» болып табылады.
