Биылғы ақпан айынан бастап қазақстандықтар алғашқы төлемдерін ала бастады. Қор қаржысы тұрғын үй жағдайын жақсартуға, сондай-ақ балалардың білім ақысын төлеуге бағытталады. Қазақстандықтар қаржыны алу үшін нысаналы жинақтарды пайдалану бойынша уәкілетті оператор ретінде тіркелген банктерге өтініш беруі қажет.
Айта кетсек, тұрғын үй жағдайын жақсартуға арналған нысаналы жинақтарды пайдалану жөніндегі уәкілетті оператор ретінде «Отбасы банкі» тұрғын үй құрылыс жинақ банкі» АҚ белгіленген, ал білім алуға арналған нысаналы жинақтарды 2 уәкілетті оператор – «Отбасы банкі» тұрғын үй құрылыс жинақ банкі» АҚ және «Қазақстан Халық банкі» АҚ арқылы пайдалануға болады.
Сондай-ақ жалпы «Ұлттық қор – балаларға» жобасының операторы ретінде Бірыңғай жинақтаушы зейнетақы қоры белгіленді. Бірыңғай жинақтаушы зейнетақы қорының мәліметіне сүйенсек, «Ұлттық қор – балаларға» бағдарламасын іске асырудың жеті айында, яғни 2024 жылдың 1 тамызындағы жағдай бойынша зейнетақы қоры жалпы көлемі 1,7 миллион АҚШ долларына 16 мың 891 өтінімді қарап, орындады. Яғни, белгіленген қаражат өтініш берушілердің банктік шоттарына есептеу үшін уәкілетті операторларға аударылды.
Миллионға жуық бала қор қаржысын пайдалана алады
Түркістан облысы білім басқармасының хабарлауынша, өңірде 18 жасқа дейінгі 964 мың 676 бала бар. Биыл оның 41 мың 841-і кәмелеттік жасқа толады. Осы ретте Бірыңғай жинақтаушы зейнетақы қорына Түркістан облысынан Ұлттық қордың қаржысын тұрғын үй жағдайын жақсартуға пайдалануға 608 өтінім келіп түсіпті. Оның ішінде 485 баланың банктік шотына жалпы көлемі 48 мың 474,05 АҚШ доллары аударылған. Ал қаржыны білім алу үшін пайдалануға Түркістан облысының 453 тұрғынынан өтінім келіп түссе, оның ішінде 296 баланың банктік шотына 29 мың 592,13 АҚШ доллары көлемінде ақша аударылған. Жалпы, «Ұлттық қор – балаларға» бағдарламасы бойынша ең көп өтініш Түркістан облысынан келіп түскен.
Одан бөлек, Мемлекет басшысы Түркістан облысына келген іс сапары барысында «Түркістан облысы – еліміздегі халық ең тығыз қоныстанған аймақ. Мұнда 2 миллионнан астам адам тұрады. Әлеуметтік саладағы бастамалар әр азаматтың тұрмысына өзгеріс әкеледі. Облыста апатты жағдайдағы және үш ауысыммен оқитын мектептер әлі де бар. Мемлекет бұл мәселені шешуге барынша күш салады. Себебі еліміздің әрбір 7-ші сәбиі осы өңірде дүниеге келеді. Оларға сапалы білім ордаларын салып, жағдай жасау – маңызды міндеттің бірі», – деп атап өткен болатын. Сонымен қатар «Біз жалынды жастарға өмірде өзінің лайықты орнын табуға жағдай жасаймыз». «Мен «Ұлттық қор – балаларға» атты жаңа бағдарлама қабылдауды ұсындым. Біз қордың жыл сайынғы инвестициялық табысының тең жартысын балалардың есепшотына аударатын боламыз. Бұл қаржыны олар кәмелет жасына толғаннан кейін баспанаға немесе білім алуға жұмсай алады. Осы шешім ұлттық табысты әділ бөлу қағидатына сай келеді деп есептеймін. Аталған шаралардың бәрі өскелең ұрпақтың болашағына арналады» деген-ді.
Мемлекет басшысының осынау сөзі жастарға жігер берді. Бұйырса, түркістандық жастар да кәмелет жасқа толғанда «Ұлттық қор – балаларға» қорындағы қаржыларын толық пайдаланып, қазірден болашағын жоспарлай алады.
Бүгінде Түркістан облысында болашағынан мол үміт күтетін жастар өсіп келеді. Жуырда ұстаздар күніне арналған салтанатты жиында Түркістан облысының әкімі Дархан Сатыбалды айрықша еңбегімен көзге түскен ұстазды ерекше марапаттады. Шәкірті 42 елдің оқу орындарынан шақырту алған «Түркістан Білім-инновация» лицейінің география пәнінің мұғалімі Бастами Арғын Ержанұлына облыстың атын елімізден бөлек, әлемге танытқан ерен еңбегі үшін көлік кілтін табыстады. Оның шәкірті Ислам Әбдірахманов қазір АҚШ-та оқып жатыр. Бұдан бөлек, оқушылары республикалық олимпиаданың жеңімпаздары болған, өзі іскер, белсенді, облыстық, республикалық байқаулардың жүлдегері Төлеби ауданы Қосан Мамытов атындағы мектебінің биология пәнінің мұғалімі, 6 баланың анасы Нұрилла Баймаханқызына ноутбук тарту етті. Міне, бүгінде өңірде осындай сыйлыққа лайықты ұстаздардың білімді, талантты шәкірттері өсіп келеді.
Түркістан облысының Білім басқармасының басшысы Ғалымжан Жұмашев облыс балабақшаларында – 156 мың, мектептерде – 522 мың және колледждерде – 42 мыңнан астам шәкірт білім алып жатқанын, ал осынау ұрпақты тәрбиелеумен 85 мыңнан астам ұстаз айналысып отырғанын атап өтті.
Балалардың болашағына ерекше көңіл бөлінген
Атап өтейік, биыл облысымызда білім саласына ерекше көңіл бөлініп отыр. Түркістан облысының әкімі Дархан Амангелдіұлының тапсырмасымен биыл 3,5 млрд теңгеге 265 арнайы пән кабинеттері алынуда. Сонымен қатар мектептердегі интернет жылдамдығын ретке келтіру мақсатында 630 млн теңгеге 330 мектепке Starlink құрылғысы орнатылған. Үздік педагогтерді басшылық қызметке конкурссыз тағайындау үшін Оқу-ағарту министрлігімен бірлесіп, 150 адамнан тұратын кадрлық резерв жасақталуда.
«Алматыдағы Абай атындағы қазақ ұлттық педагогикалық университетімен республикада алғаш рет біздің облыстың 500-ден аса мектеп директорлары арнайы менеджмент курстарынан өте бастады. Мұғалімдер мен әдіскерлеріміз Жапония, АҚШ, Германия, Франция, Малайзия және Финляндия елдерінде арнайы халықаралық оқу курстарына барып, біліктіліктерін арттырды. Бұл бағыттағы жұмыстар өз жалғасын табатын болады. Облыста 419 мектеп асханасы жеке инвесторлармен жаңғырту жобасы іске аса бастады. Сонымен қатар биыл 300-ден астам білім беру мекемелері жөндеуден өткізілді», – дейді Ғалымжан Сұлтанбекұлы.
Одан бөлек, өңірде 29 жайлы мектеп құрылысы жүруде. Сондай-ақ облыстық және арнайы қордың (Білім инфрақұрылымын дамыту қоры) қаржы көздерінен 21 мектеп салынуда.
Биыл облыс колледждерінде 10 жаңа мамандық ашылып, онда дәріс оқитын оқытушылар мен шеберлер көршілес ТМД мемлекеттерінде, сондай-ақ Германия, Франция, Аустрия, Түркия және Қытайда арнайы халықаралық оқу курстарынан өтіп жатыр.
Білім басқармасының басшысы сонымен бірге облыстың барлық мектептеріне жаңа оқу жылынан бастап тың инновациялық жобалар енгізілетінін, бұл білім сапасына оң әсер етуі тиістігін жеткізді. «Корей еліндегі ІТ саласындағы көшбасшы жоғары оқу орыны WOOSONG университетімен келіссөздер жүргізілгенін, енді облыс әкімдігі Ғылым және жоғары білім министрлігінің қолдауымен 2025 жылы Түркістан қаласынан WOOSONG университетінің өкілдігін ашатынын мәлімдеді. Онда ІТ саласы бойынша кәсіби мамандарды даярлайтын болады.
«Балаға дұрыс білім берілмесе, оның экономикалық ауыртпалығы ел дамуын тежейтін болады. Сондықтан да бала оқыту ісіне жауапкершілікті күшейтіп, нәтиже шығарады деп сенемін! Ол үшін алдымен педагогтердің өзі кәсіби білімді болуы тиіс», – деді Ғалымжан Сұлтанбекұлы.
Мемлекет басшысының бастамасымен жүзеге асып отырған осынау балаларға арналған қамқорлықтардың нәтижесінде еліміздің ертеңіне сенім мол.
Назгүл НАЗАРБЕК,
Шымкент қаласы