Танымал әнші Заттыбек Көпбосынұлы той бизнесінде жүрген әріптестері жайлы ойын бөлісті, – деп хабарлайды Aikyn.kz.
Оның пайымынша, эстрада жұлдыздарының күні тойға қарап қалмаған, тойсыз-ақ күндерін көре алады.
"Кешегі пандемия көп нәрсені ашып берді. Әншілердің өзінде әртүрлі саланы игеріп кеткендер болды. Олардың арасында сол салаға түгелімен кетіп жатқандар да болды. Ризықты беруші – Алла. Біз оны бекер уайымдаймыз. Той болса да, болмаса да әншілер аш қалмайды. Оны коронавирустың кезінде, ешқандай той жоқ кезде көріп, түсіндік. Бәлкім, көбіне қиынға соққан болар, бірақ үйреніп кеттік", – деді ол.
Заттыбек Көпбосынұлы – қазақстандық әнші және музыкант. Әншінің "Ақмаржан", "Нартәуекел" "Бүлдірген" деген әндері ел арасында танымал.