Министрлік 73 жастағы кейуананы зейнетақыны артық алып келген деп сотқа берген. Әжей 2021 жылы қайтыс болған. Оның қарызын мұрагері болып саналатын жесір әйелден қайтарып алмақ болған. Сот шешімімен ведомствоның арызы қанағаттандырылған жоқ, – деп хабарлайды Aikyn.kz.
«73 жастағы зейнеткер 2000-2021 жылдар аралығында жасы бойынша зейнетақы алған. Зейнетақы төлемдерін тағайындау кезінде төтенше радиациялық қауіпті аймақта тұратыны туралы Семей облысы Бесқарағай ауданының мұрағатынан анықтама берген. 2021 жылы уәкілетті органның тексеруі кезінде оның төтенше радиациялық қауіпті аймақта тұруы туралы ақпарат ішінара расталды.
Көбейтілген зейнетақыны заңсыз алу фактісіне сілтеме жасап, оған артық төленген 13 миллион теңгеден астам соманы белгілей отырып, зейнетақы мөлшері қайта есептелді. 2021 жылғы 15 шілдеде зейнеткерге артық төленген соманы қайтару туралы талап-хабарлама және құқығының жоқтығына байланысты зейнетақы төлемдерінен бас тарту туралы шешім, сондай-ақ жалпы негізде зейнетақы тағайындау туралы өтініш тапсырылған. 2021 жылдың 16 шілдесінде зейнеткер қайтыс болған. Еңбек және халықты әлеуметтік қорғау министрлігі мұрагер ретінде жесір әйелден артық төленген зейнетақының 13 миллион теңгеден астамын өндіру туралы сотқа шағым түсірген», – деп жазылды Жоғарғы соттың хабарламасында.
Уәкілетті орган қайтыс болған зейнеткер заңсыз байыған, енді оның қарызын мұрагері қайтарсын деген талап қойған. Бірінші сатыдағы сот министрліктің талабынан бас тартқан, ал апелляциялық сот олардың талабын орынды деп таныған.
Жоғарғы сот егер мұра қалдырушының залал келтірудегі кінәсі анықталмаса, мұрагерлер оның міндеттемелері бойынша жауап беруге міндетті еместігін көрсете отырып, бірінші сатыдағы соттың шешімін өзгеріссіз қалдырды.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.