Іс-шараға зиялы қауым өкілдері, жастар және қала тұрғындары қатысты. Шымкент қаласының Ішкі саясат және жастар істері басқармасының қолдауымен ұйымдастырылған форум аясында мемлекеттік рәміздерге арналған көрме өткізілді. Мерекелік жиын Мемлекеттік Ту мен Әнұранды ұлықтаумен ашылды.
Шараның ашылуында сөз алған қала әкімінің орынбасары Сәрсен Құранбек рәміздерге деген құрмет егемендіктің белгісі екенін атап өтті.
«Еліміздің егемендігі жөніндегі декларация қабылданған 25 қазан – Қазақстан Республикасының тәуелсіздігінің бастауына айналған күн. Мемлекет басшысы Қасым-Жомарт Кемелұлының бастамасымен қайта жаңғырып, ұлттық мәртебеге ие болған бұл мереке мемлекеттің тұтастығы мен халқымыздың ынтымақ-бірлігін бекемдей түсуде, жас ұрпақты патриоттық рухта тәрбиелеуде ерекше мәнге ие. Рәміздер күнінде басталып, Республика күнінің қарсаңында қортындыланғалы отырған «Көк Тудың желбірегені» патриоттар форумы да осы мақсатпен керемет үйлесім тауып отыр», – деді Сәрсен Абайұлы.
Тәуелсіздіктің тұмарына айналған мемлекеттік рәміздерді қадірлеп, құрмет тұту – әрқайсымыздың қасиетті борышымыз екенін, мемлекеттік рәміздер – еліміздің егемендігі мен біртұтастығын бейнелейтін қасиетті нышандар болатынын жеткізді.
Форум барысында Тәуелсіздік құндылықтары, мемлекеттік рәміздерді насихаттау арқылы отансүйгіштік, патриоттық сезімдерді тәрбиелеу, мемлекеттік рәміздерге деген терең құрметті қалыптастыру мақсатында Шымкент қалалық Ішкі саясат және жастар істері басқармасының қолдауымен ұйымдастырылған «Үздік пост», «Үздік ролик», «Үздік іс-шара» байқауының жеңімпаздары марапатталды.
«Үздік іс-шара» номинациясы бойынша бас жүлде – Төлеген Тәжібаев атындағы №47 мектеп-гимназиясына бұйырды. Мектеп оқушылары әлеуметтік желіде көп қаралым жинаған бейнеролик дайындап, жобаға зор үлес қосқанын атап өту керек. Мектеп директоры Ақмарал Сәрсенбаеваның айтуынша, бұл іс-шара – қатысушылардың арасында ғана емес, қала, тіпті республика көлемінде танылған жоба.
Форум соңында Шымкент опера және балет театры мен «Шымкент концерт» ұйымының өнерпаздары мерекелік концерт қойып, мерекелік шараны ерекше көңіл күймен аяқтады.
Назгүл НАЗАРБЕК