ҚР Парламенті Мәжілісінің депутаттары палатаның бүгінгі жалпы отырысында "2025-2027 жылдарға арналған республикалық бюджет туралы" заң жобасын қарап, мақұлдады. Құжат Сенаттың қарауына жіберілді, – деп хабарлайды Aikyn.kz.
Аталған заң жобасы ҚР Бюджет кодексіне сәйкес әлеуметтік-экономикалық даму болжамын, 2025-2027 жылдарға арналған бюджет параметрлерін және Президенттің тапсырмаларын негізге ала отырып әзірленген.
– 2025-2027 жылдарға арналған республикалық бюджет жобасын әзірлеуге әлемдік экономиканың тұрақты қалыпты өсу қарқынын, инфляциялық фонның төмендеуін, қаржы және тауар нарықтарындағы тұрақтандыруды болжайтын базалық сценарий негіз болды. Алдағы орта мерзімді кезеңдегі ЖІӨ-нің орташа жылдық өсу қарқыны 5,4%-ға жетті. Атаулы ЖІӨ 2025 жылы 150,8 триллион теңгеден 2029 жылы 234,2 триллион теңгеге дейін өседі деп болжануда. Базалық сценарийде мұнай бағасы барреліне 75 доллар болып белгіленген. Жылдық инфляцияның мақсатты дәлізі 2025 жылы 5,5-7,5 пайыз, 2026 жылы 5-6 пайыз деңгейінде, кейін 2027-2029 жылдары 5 пайызға дейін төмендейді, – деді депутат Еркін Әбіл.
2025 жылға арналған республикалық бюджет түсімдерінің болжамы (трансферттерді есепке алмағанда) 15,6 триллион теңге сомасында немесе биылғы жылғы болжамның 122,8%-ы 2,9 трлн теңгеге асыра орындалды.
Ал трансферттік түсімдердің болжамы 2025 жылға 5,7 трлн теңге және 2026 және 2027 жылдарға 2,5 триллион теңгеден сәл асады деп болжанып отыр.
– Қазақстан Республикасының Ұлттық қорынан 2025-2027 жылдарға арналған кепілдендірілген трансферттердің көлемі жыл сайын 2 трлн теңге шықса, 2025 жылы Қазақстан Республикасының Ұлттық қорынан сомада нысаналы трансферт тарту жоспарлануы 3,2 трлн теңгеге есептелді, – деп нақтылады депутат.
Бюджет шығыстарының басым бағыттары мемлекеттік әлеуметтік міндеттемелерді толық орындау, ғылымды, білім беруді, медицинаны қолдауды арттыру арқылы адами капиталды дамыту болып қала бермек.
– Республикалық бюджет шығыстарының жалпы көлемі 2025 жылы – 25,7 триллион теңге, 2026 жылы – 23,1 триллион теңге, 2027 жылы – 24,5 триллион теңге жоспарланып отыр. Шығыстар жалпы сомасы 72,5 триллион теңге тапшылықта жоспарланған. 2025 жылға арналған бюджет 4,1 триллион теңге, 2026 жылға – 3,7 триллион теңге, 2027 жылға – 3,6 триллион теңге болады, – делінген Мәжілістің тиісті комитетінің қорытындысында.
Заң жобасын қарау барысында Мәжіліс депутаттары өңірлерді дамыту мәселелерін шешу үшін бюджет шығыстарын ұлғайту бойынша түзетулер енгізуді ұсынды.
Атап айтқанда:
- "Ауыл – ел бесігі" бағдарламасын іске асыруға 15 млрд теңге;
- сумен жабдықтау және су бұру мәселелерін шешуге 14,7 млрд теңге сомасында;
- 25 млрд теңгеден астам басқа да инфрақұрылымдық жобалар.
Шығындарды оңтайландыру есебінен мемлекеттік органдар арасында жалпы сомасы 15 млрд теңгені, сондай-ақ мемлекеттік органдардың ішінде шығындарды өсірмей басым бағыттар бойынша 2,2 млрд теңге сомасында қайта бөлу жүргізілді.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.