Ұзақ жылдар бойы ұлағатты ұстаздық пен тума талант ақындықты домбыраның қос ішегіндей қастерлеген Жабекеңнің шабытты шақтарын дәлелдейтін «Ауыл әуендері», «Алтын бесік ауылым», «Алакөлім ауылым», «Күнгейім менің», «Балалық қызық бал күндер», «Тұсаудағы тума», «Жырлайды жылдар» және «Ауылым алтын қазынам» атты жыр жинақтары бір төбе болса, туған жердің әнұранына айналған «Ауылым», «Қайран дәм», «Күндер-күндер», «Үржар вальсі», «Достық толғауы» және «Үржарым – құтты мекенім» атты ән мәтіндері де бір төбе.
Ел мен жерін емірене сүйіп, ет жүрегі елжірей жырлаған лирик ақын, ардагер ұстаз, тау тұлғалы ақсақал Жабайыл Бейсеновтің асқақ абырой, биік бедел иесі екендігін «ҚР Білім беру ісінің үздігі», «Қазақстан Жазушылар одағының мүшесі», «ҚР Мәдениет саласының үздігі» және «Үржар ауданының Құрметті азаматы» сияқты айшықты атақтарынан айқын тануымызға болады.
Республика күніне орай Мемлекет басшысы Қасым-Жомарт Тоқаевтың Жарлығымен жасы 90-нан асатын абыз ақсақалымыз Жабайыл Бейсенов «Құрмет» орденімен марапатталды. Абыройлы марапатты Үржар ауданының әкімі Ақылбек Башимбаев, орынбасарлары Серік Тілемесов, Әнет Тұрлыбеков, аудандық мәслихат төрағасы Асқар Омаров, Абай облыстық мәслихаты депутаты, кәсіпкер Мамырбек Қарашев, жергілікті ақындар Амангелді Заманбекұлы мен Серікбек Туғанов және аудандық мәдениет үйінің директоры Қанат Сатмұхаметов арнайы барып, салтанатпен табыстады.
Амантай ОСПАНОВ,
ҚР Журналистер одағының мүшесі