Сондай елді мекендердің бірі – балықшылар тұратын Көпбірліктегі көп мәселенің басында күйі кеткен күре жол тұрған болатын. Бұл жолға бұған дейін бірнеше рет қаржы бөлінгенімен, мердігерлер күрделі жөндеуді қайта-қайта сиырқұйымшаққа салып, ақырында жолды да қатырмай, бөлінген ақшаны да су аяғы құрдымға жіберіп тынғаны есімізде. Сонымен бірге Балқаштай кішігірім теңіздің жағалауындағы ауылда ауызсу да үлкен проблема еді. Таза сумен қамтуға да бірнеше рет қаржы қарастырылғанмен, олар да жолға бөлінген қаражаттың кебін киген. Бұдан басқа да проблемалар жетіп артылатын шалғай ауылдың шырайы кіретін болды.
Қаратал ауданына жұмыс сапарымен барған облыс басшысы жылдар бойы жырға айналған жолдың біткені туралы айтты. Айтып қана қойған жоқ, онда атқарылған жұмыстарды өз көзімен көріп қайтты.
«Үштөбе – Алмалы – Көпбірлік» автомобиль жолының жалпы ұзындығы – 176 шақырым, соның 137 шақырымы жөнделсе, оның 78,5 шақырымы биыл төселіпті. Ал қалған бөлігі жақсы және қанағаттанарлық жағдайда екен.
Көпбірліктен Алмалы ауылына дейінгі ұзындығы 28 шақырым жол бөлігіне 2021 жылы орташа жөндеу жасалыпты. Жолдың қалғанының жұмысы төрт бөлікпен атқарылған көрінеді.
– Былтыр жалпы ұзындығы 30 шақырым болатын учаске жөнделді. Бүгінде автотрассаның 40 шақырымына, яғни 90-147 шақырым бөлігіне асфальт төселді. Қазір абаттандыру жұмыстары жүргізілуде. Бұл жұмыстар 10 қарашаға дейін бітеді. Трассаның екінші және үшінші учаскелерінде де жөндеу аяқталып, пайдалануға берілді. Жолдың барлық учаскесі асфальтталды. Жобаның құны 4,9 млрд теңгеден асады. Жол 3-ші санатты, жүру бөлігінің ені – 7 метр, – деді жол құрылысы туралы баяндаған облыстық Жолаушы көлігі және автомобиль жолдары басқармасының басшысы Ғалымжан Дәрібаев.
Облыс әкімі жөндеу жұмыстарының сапалы атқарылғанын атап өтіп, мердігер компания жұмысшыларына істі уақытылы аяқтағаны үшін ризашылығын жеткізді.
– Халықпен кездесулер кезінде тұрғындар Көпбірлік ауылына баратын жолдың мәселесін жиі көтеретін. Осыған байланысты оны жөндеуге қатысты нақты шаралар қабылдадық. Қазір толық жөнделіп бітті. Бұл трассамен жүк көліктері көп жүрмейтіндіктен және жұмыс сапалы орындалғандықтан, жол кемінде он жыл қызмет етеді. Көпбірлік – шалғайда жатқан ауыл. Алдымен оның жолын жасадық, сосын ауызсу сапасын жақсарттық. Бұдан әрі де шалғайдағы және шекаралық ауылдарды дамытуға бағытталған нақты жоспарлар бар, – деді Бейбіт Исабаев.
Ауызсу демекші, Көпбірлік ауылында бұл мәселе де шешімін тапты. Ауылда орталықтандырылған су құбыры болғанымен, соңғы жылдары тұрғындар тұзды су ішуге мәжбүр еді. 2010 жылы ауылда сумен жабдықтау жүйесі қайта жаңғыртылған. Жаңа желілер салынып, тереңдігі 100 метрден асатын ұңғыма қазылып, тұщыландыру қондырғысы орнатылды, ысырмалары ауыстырылды. Бірақ қыруар қаржы жұмсалған жоба дұрыс нәтиже бермеген. Соңғы жылдары судың тұздылығы литріне 5,9 грамнан 8 грамға дейін өсіп, тұрғындар таза суға зәру болып қалған. Ақыры бюджеттен қаражат бөлініп, мәселені шешуге қажетті шаралар қабылданды. Атап айтқанда, 2 шақырым желіге қайта жаңғырту жүргізіліп, жаңа су мұнарасы тұрғызылды, оған қоса тұздану деңгейі литріне тіпті 12 грамға жеткен күнде де суды тұщыландыруға қуаты жететін жаңа қондырғы орнатылды.
Көпбірлік ауылының тұрғындары облыс әкімімен жүздесуге жуырда пайдалануға берілген денешынықтыру-сауықтыру кешенінің алдына жиналды. Олар ауылға келетін жолдың жөнделіп біткеніне және ауызсудың сапасы жақсартылғанына ризышылығын білдірді.
– Көпбірлік – облыстың ең шалғайдағы ауылының бірі. Мемлекет басшысының тапсырмасына сәйкес біз облыс орталығына жақын елді мекендерді ғана емес, алыс жатқан ауылдарды абаттандыру мен дамытуға ерекше көңіл бөлудеміз. Халықтың өмір сүру сапасын жақсарту үшін ең бірінші сапалы ауызсу, жол, жарық және әлеуметтік нысандар керек. Тұрғындар тұрмыстың жақсарғанын сөз жүзінде емес, іс жүзінде сезінуі тиіс. Сіздердің ауылға келетін жолды жөндеп бітірдік, ауызсудың сапасын жақсарттық, денешынықтыру-сауықтыру кешенін, ауылдық әкімдік салып бердік. Енді сіздердің өтініштеріңізге сәйкес кітапханасы бар мәдениет үйі тұрғызылады. Екі ауылдық округке ортақ өрт сөндіру депосын құрып, қажетті техникамен қамтамасыз етеміз. Сол сияқты көшелерді жөндеуге, жарықтандыруға назар аударылады, – деген облыс басшысы халықтың өмір сүру сапасын жақсарту мақсатындағы осындай жұмыстар әлі де жалғасатынын жеткізді.
– Ұзақ жылдардан бері біздің шалғайдағы ауылға арнайы келген бірінші облыс әкімісіз. Бұл ауылдықтардың мәселесі назардан тыс қалмайтынын көрсетеді деп ойлаймын. Мысалы, ауылымызда заманауи денешынықтыру-сауықтыру кешені салынды. Мұнда балаларымыз дзюдо, волейбол, баскетбол, тоғызқұмалақ, үстел теннисінен секцияларға барып, спортпен айналысуда. Осы жерден мықты чемпиондар шығады деп сенеміз. Ендігі бір тілегіміз, осы спорт кешенінің артында орын бар, сол жерге балалар үшін воркаут алаңын салып берсеңіздер, – деді ауыл тұрғыны Нұрлан Бердахметов.
Тағы бір тұрғын ауыл балаларын түрлі жарысқа апару үшін шағын автобус бөлінсе деген тілегін жеткізді. Облыс әкімі айтылған ұсыныстарды қолдап, аудан әкіміне және басқа да тиісті лауазымды тұлғаларға нақты тапсырмалар берді. Балқаш көлінің жағалауына апаратын 2,5 шақырымдық жолдың мәселесіне де назар аударды. Тұрғындардың айтуынша, жаңбырлы күндері жағалауға жету қиын. Облыс әкімі аталған жолға қиыршық тас төсеуге қаржылай көмек көрсетілетінін айтты.
Болат АБАҒАН,
Жетісу облысы