Nur Otan партиясының пәрменімен бүгінде тұрғындардың тілегі қанағаттандырылып, күрмеуі қиын түйткілдердің түйіні тарқатылуда. Жамбыл облысы Т.Рысқұлов аудандық партия филиалына қайырылған ауыл тұрғыны Әсем Бакееваның да өтініші ескерусіз қалмай, шешімін тауып отыр.
Әсем Сатенқызы партиядан 2013 жылы Абай ауылында тұрғызылған тұрғын үйіне жарық желісін жеткізуді сұрап келген. Бакеевтер әулеті бұған дейін электр желісін көршісі арқылы пайдаланып келгендіктен оның шығынын да еселенген бағамен төлеген. Бұл мәселеге жіті назар аударған партия өкілдері қазір отбасын электр желісімен толықтай қамтамасыз етіп берді.
– Партияның «Халыққа көмек» жобасы аясында Т.Рысқұлов ауданы Абай ауылындағы Әсем Бакееваның үйіне көшпелі комиссия барып, зерделеу жұмыстарын жүргізді. Нәтижесінде, жарық жүргізуге қажетті бағаналар мен құрылыс материалдарының есебі шығарылып, 214 мың теңгеге жарық жүргізілді. Бір ай ішінде біткен құрылыс жұмыстарының арқасында аталған жанұя электр жарығының қызығын көріп отыр. Негізі Әсем Бакееваның тұрғылықты жері Луговой ауылында тіркелген. Ал Абай ауылында оның ағасы Бауыржан Бакеев тұрады. 2018 жылы Әсем Сатенқызының өтініші бойынша Абай ауылдық округі Көкарық ауылы Жастар көшесі №31 «б» мекенжайы бойынша жер телімі берілді. Үй тұрғызылатын жерге дейін электр желісі жүргізіліп берілді. Осылайша, аталған азаматшаның барлық жағдайын жасап отырмыз, – дейді Абай ауылдық округінің әкімі Мұратбек Арыстанбеков.
Әсем Бакеева өтінішін ескерусіз қалдырмаған партия өкілдеріне дән риза.
– Шынымды айтсам, бәрі бұлайша тез бітеді деп ойламадым. Бір айдың ішінде құрылыс жұмыстары аяқталып, үйіме жарық кірді. Қазір соның рақатын көріп отырмыз. Тұрғын үй құрылысы үшін алған жер теліміме де жарық жеткізілді. Осынау жұмысқа ұйытқы болған Nur Otan партиясына және округ әкімі Мұратбек Арыстанбековке алғысым шексіз. Мен секілді жалғызбасты аналарға жасаған жақсылықтарыңыз Алладан еселеп қайтсын, – деді Әсем.
Иә, жалғызбасты анаға жасалған бұл жақсылық қандай мақтауға да лайық. Ең бастысы қара халықтың өтініші толықтай қанағаттандырылғаны жан жылытады.
С.ТІЛЕУЖАН
