Есірткі сатушылар өздерінің жарнамасын үй сыртына жазып кететіні де бар. Ол жазбаны өшіру бірнеше уақытты алады. Мысалы, қыркүйек айында Қарағандыда есірткі таралуына қарсы күрес пен салауатты өмір салтын насихаттауға арналған ауқымды акция өтті. Іс-шараға 1 000-нан астам адам қатысты. Олар есірткі заттарының жарнамасы бар заңсыз граффитиді өшірді.
Акция барысында қатысушылар топтарға бөлініп, әр топ учаскелік полиция инспекторларының басшылығымен белгіленген секторларда жұмыс істеді. Нәтижесінде, қала аумағындағы 4 200-ден астам заңсыз жазу мен сурет өшірілді.
Қарағанды облысында жыл басынан бері 332 есірткі қылмысы анықталып, 445 келі есірткі тәркіленді. Бұдан бөлек, екі жерасты фотозертханасы жойылды. Сол сияқты есірткі бизнесімен айналысқандардың қызметі тоқтатылды, жылдық қаржы көлемі 2,5 млрд теңгеден асқан 16 күдікті ұсталды. Бұл – аймақаралық штабтың отырысында айтылған цифр.
– Бұл бағыттағы жұмыстарды жандандыру мақсатында Қарағанды, Теміртау, Саран, Шахтинск және Балқаш қалаларында еріктілер мен қоғамдық ұйымдардың қолдауымен «СТОП-граффити» ұранымен ауқымды акциялар өткізілді. 2024 жылдың 16 қазанына дейін 410 рейд жүргізіліп, 11 902 наркограффити боялды, – дейді Қарағанды облыстық полиция департаменті басшысының міндетін атқарушы Жасқайрат Қайыров.
Заманауи технологиялар дәуірінде қылмыскерлер есірткіні тарату үшін әлеуметтік желілер мен мессенджерлерді көбірек пайдаланады. Осыған дейін облыстық Полиция департаментінің өкілдері есірткіні жарнамалайтын 177 сайт пен парақшаны бұғаттаған.
Есірткіден емдеу мен оның алдын алу мәселелері де басты назарда. Таяуда облыстық психикалық денсаулық орталығында газды хроматограф жұмыс істей бастайды. Денсаулық сақтау басқармасының басшысы Бибігүл Төлегенова бұл құралдың көмегімен адамның ағзасында 100-ден астам есірткі түрін анықтауға болатынын айтады.
Қарағанды облысының әкімі Ермағанбет Бөлекпаев есірткіге қарсы профилактика жоғары оқу орындарында, колледждер мен мектептерде қолжетімді формада жүргізілуі керектігін жеткізді.
– Полиция қызметкерлері қала және аудан әкімдерімен бірге үнемі аулаларды аралап, есірткіні жарнамалайтын орындарды алдын ала анықтауы қажет. Денсаулық сақтау басқармасы мектеп оқушылары мен студенттер арасында үнемі скрининг ұйымдастыруға тиіс. Облыстық диспансер жанынан анонимді кеңес беретін консультациялық орталық ашу қажет. Аймақта есірткіге қарсы күрестің негізгі мақсаты – қоғамды есірткіге тәуелділікпен күресуге шақыратын қоғамдық қозғалыс құру керек. Қарағанды облысы есірткіден таза аймаққа айналуға тиіс, – дейді Ермағанбет Бөлекпаев.
Қарағанды облысының прокуроры Бауыржан Мырзакеров «есірткі бизнесіне қарсы күрес жалғасып жатыр» дейді. Облыс прокуратурасы есірткі бизнесімен күреске бағытталған «Нашақорлыққа жол жоқ» жобасын жүзеге асыруда. Ведомствоаралық топ құрылған.
– Осы жұмыстың нәтижесінде есірткі заттарын насихаттайтын 7 мыңнан астам жарнамалық сайттар анықталып, бұғатталды. Есірткі заттарын белгілі жерлерде қалдырушылардың көшелердегі жарнамалық жазбалары мен граффитилерін бояу шаралары қолданылды. Есірткіні жарнамалағандар үшін 55 қылмыстық іс қозғалды, оның 33 жоба аясында. Әлеуметтік желілерде, оның ішінде 98 Telegram-каналдарда мазмұны заңға қайшы және заңсыз әрекеттерге шақыратын 174 сілтеме бұғатталды. Ауылдық жерлерде жабайы қарасораны анықтау және жою жұмыстары белсенді түрде жүргізілуде. Жоба барысында Осакаров, Нұра және Қарқаралы аудандарында 200-ден астам қарасора бұталары жойылды, – дейді Бауыржан Мырзакеров.
Әдебиет БЕЛГІБАЙҰЛЫ,
Қарағанды облысы