Шымкент қалалық перинаталды орталықта жаңа туған сәбиге күрделі ота жасалды. Қалалық перзентханадан орталықтың реанимация және интенсивті терапия бөліміне, 3600 гр салмақпен туылған ер бала жеткізілді, – деп хабарлайды Aikyn.kz otyrar.kz-ке сілтеме жасап.
Кеңірдек ақауымен туылған нәрестеге «өңештің туа біткен атрезиясы яғни кеңірдек-өңештік жыланкөз» диагнозы қойылған. Жедел әрекет еткен орталықтың тәжірибелі дәрігерлер тобы сәбиге «Кеуде ішілік эзофаго-эзофагостомия» операциясын жасап шықты.
Баланың қазіргі жағдайы тұрақты. Ол дәрігерлердің жіті бақылауында.
Айта кетейік, қалалық перинаталдық орталықта биылдан бастап неонаталдық хирургиялық операциялар жасала бастады. Бүгінге дейін ішкі ағзаларының ақауымен туылған 40-там астам сәбиге күрделі ота жасалды.
Қазіргі таңда нәрестелерге реанимациялық және интенсивті терапия қызметін көрсететін бөлімшедегі неонаталдық хирург, анестезиолог-реаниматолог және неонатолог-реаниматолог дәрігерлер, денсаулығында кінәраты бар сәбилерді ажалдан арашалау жолында табанды еңбек етуде.