Алдағы жалпы отырыста депутаттар Қазақстан Республикасы Су кодексінің жобасын және су ресурстарын қорғау және пайдалану мәселелері бойынша ілеспе түзетулерді бірінші оқылымда қарайды.
Құжат Мемлекет басшысының тапсырмасына сәйкес климаттың өзгеруі мен көршілес мемлекеттердің саясатын ескере отырып, су заңнамасын жетілдіру мақсатымен әзірленген. Қолданыстағы кодекс 2003 жылы қабылданып, негізінен суды пайдалануға бағытталған болатын.
Кодекс жобасының негізгі ережелері еліміздің су әлеуетін сақтау және оны тиімді пайдалану үшін су ресурстарын қорғаудың басымдығын қамтамасыз етеді. Суды пайдалану лимиттерін анықтау тетігі қайта қаралды. Ол экологиялық ағынды суды анықтағаннан кейін қалған судың көлемі шегінде есептелетін болады. Сонымен бірге экономика салаларын қайта пайдаланатын және (немесе) айналымды сумен жабдықтау бойынша жаңа норма, сондай-ақ балама су көздерін (қар суы, тасқын су, тазартылған сарқынды су) жинақтау және пайдалану саласында жаңашылдықтар енгі-зілуде.
Ілеспе заң жобасында 5 кодекс пен 9 заңға өзгерістер мен толықтырулар енгізіледі.
Бұдан бөлек, депутаттар халықаралық келісімдерді ратификациялауға қатысты бірқатар заң жобасын қарап, жұмысқа алады.