Жалпы, биылғы 10 айдың қорытындысымен Сыр өңірі макрокөрсеткіштер бойынша көш бастап тұр. Облыс бюджеті молайып, 744 млрд теңгеден асады.
Облыс әкімі өз хабарламасында өңірде атқарылған жұмыстар мен мақсат-міндеттерді егжей-тегжейлі баяндады. Алдағы уақытта атқарылар жобаларға да кеңінен тоқталды.
«Бүгінде Президентіміздің, Үкіметтің ерекше қолдауының арқасында облысымыздың бюджеті өсті. Осыдан екі жыл бұрын 364 млрд теңге болса, биыл 744 млрд теңгеден асты. Соның негізінде осы жылдың 10 айының қорытындысымен облыстың әлеуметтік-экономикалық дамуында өсім қалыптасты. Өңірлер арасында көшбасшылар қатарынан көріндік. Атап айтсақ, өнеркәсіп өндірісі – 0,8, өңдеу өнеркәсібі – 22,8, ауыл шаруашылығы – 3, құрылыс жұмыстарының көлемі – 50, тұрғын үй – 7,4, көлік – 3,5, сауда 6,5 пайызға өсті. Биылға жоспарланған 517 млрд 500 млн теңге инвестицияның 478 млрд 300 млн теңгесін 10 айда тарттық. Оның 74 пайызы – жеке инвестициялар», – деді Қызылорда облысының әкімі Нұрлыбек Нәлібаев.
Аймақ басшысы атап өткендей, соңғы 2 жылда өңірде құны 19 млрд 600 млн теңге болатын 22 инвестициялық жоба іске қосылған. Биылдың өзінде өңдеу өнеркәсібінде 10 млрд 700 млн теңгенің 13 жобасы жоспарланған. Бүгінде 9 жоба қолданысқа берілген.
Облыста өңдеу өнеркәсібін дамыту арқылы өңір экономикасын әртараптандыру жұмыстары да қолға алынған. Осылайша, мұнай қорының сарқылуы салдарынан соңғы 10 жыл бойы төмендеу тенденциясын көрсетіп келген өнеркәсіп өндірісі кейінгі жылдары қыркүйек айынан бастап оң динамикаға шығып отыр.
Жалпы, Сыр өңірінің дамуына ерекше серпін беретін игі бастамалар аз емес. Жуырда ғана бой түзеген жаңа әуежай терминалы, теннис орталығы, «Жайлы мектеп» бағдарламасы шеңберінде қолданысқа берілген алғашқы білім ордасы, шыны зауыты – соның айқын көрінісі.
Көшпелі брифингте аймақтық және республикалық басылымдар мен телеарналар журналистері екі сұрақтан қойып, көкейдегі мәселеге тұшымды жауаптарын алды.
Ербақыт ЖАЛҒАСБАЙ,
Қызылорда облысы