Түркістан облысында психикалық ауытқуы бар науқастар мекеме ішінде зорланған, деп хабарлайды Aikyn.kz.
"УДЗ-ге апардым. Сол кезде 10 апта 4 күн деп берді. Бір емес, екі рет түсірдік. Сол кезде 2,5 айлық екенін білдік. Қызым айтты тергеуде. Темір кереуетке, теледидар бөлмесінде, камерасы жоқ жерде аяқ-қолын темір кереуетке байлап, тартып, ұйықтататын аминазин деген уколды салып тұрып, екі санитар істеген екен. Камерасы жоқ жерде, баспалдақта істеген екен. Тағы шатырға шығарып істеген екен. Төбені жинайды деп шығарады екен", - дейді зәбір көрген 17 жастағы қыздың анасы Оtyrar.kz-ке.
"Түркістан облыстық психикалық денсаулық орталығында жатып, қорландым" деген тағы бір қыз бар болып шықты. 21 жастағы науқас болған жайтты бірден жақындарына айтқан. Жәбірленушіден анализ де алыныпты. Алайда арызды бірден қабылдамаған құзырлы орган өкілдері "үш айдан бері қол қусырып отыр" дейді қыздың анасы.
"Осы екі санитардың үстінен арызданғанбыз. Қылмыстық іс қозғалып, ешқандай әрекет істеп жатқан жоқ. Бармаған жерім қалмады. Жазуындай жазып жатырмын. Камераны да бізге көрсетпеді ғой. Одан кейін амал жоқ адвокат жалдадым. Адвокатпен барып, камераны алдық, бірақ оны көруге маған мүмкіндік бермеді. Мүмкін арасында өздері тазалап өшіріп тастаған шығар. Не тергеуші көрсетпейді", - дейді жәбірленушінің анасы.
Түркістан облысының психикалық денсаулық орталығы аталған жайтқа қатысты пікір білдіруден бас тартқан. Ал арызды бірнеше айдан кейін қабылдады деген полицейлер әлі күнге дейін сараптама жүргізіліп жатқанын жеткізді.
"Аталған іс бойынша қылмыстық іс қозғалды. Тиісті сараптамалар өткізіліп жатыр. Нәтижесі бойынша процесуалды шешім қабылданады", - дейді әл-Фараби ауданы полиция басқармасының бастығы, полиция полковнигі Батыр Мырзагелдиев.
Қазір екі науқас та үйінде. Кәмелет жасына толмай жүкті болып шыққан біреуі жасанды түсік жасатқан.