Астана қаласының азаматтық істер жөніндегі ауданаралық соты мектеп директорының бұрынғы оқытушысына қатысты ар-намысын, қадір-қасиетін және іскерлік беделін қорғау, сондай-ақ моральдық зиянды өндіру туралы талап қоюы бойынша азаматтық істі қарады, – деп хабарлайды Aikyn.kz.
Істің мән-жайларынан жауапкер жұмыстан шығарылғаннан кейін Facebook әлеуметтік желісінде мектеп директорының заңдарды бұзғанын атап, оқушыларға қатысты орынсыз әрекеттер жасаған үйірме оқытушысына қатысты шара қолданбағаны туралы айыптап, хабарлама таратқаны анықталды.
Филологиялық-психологиялық зерттеудің қорытындысы бойынша, жалпы ақпаратта талап қоюшының ар-намысы мен қадір-қасиетіне нұқсан келтіруі мүмкін жағымсыз сөздер бар екендігі расталды.
АК-нің 141 және 143-баптарына сәйкес, жалпы мәліметтердің шындыққа сәйкестігін дәлелдеу міндеті жауапкерге жүктеледі.
Жауапкер сотқа таратылған мәліметтердің дұрыстығын растайтын дәлелдемелерді ұсынбады.
Сот шешімімен жарияланымда жарияланған фактілер шындыққа жанаспайды және талап қоюшының ар-намысы мен қадір-қасиетіне нұқсан келтірілген деп танылды.
Жауапкерге жеке аккаунтта кешірім сұрау арқылы хабарламаны алып тастау және ақпаратты жоққа шығару міндеті жүктелді.
Сонымен қатар жауапкерден моральдық зиян және сот шығындары өндірілді.
Сот шешімі заңды күшіне енді.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.