Соттың мәліметінше, қайғылы оқиға Қарабалық ауылындағы хоккей кортының құрылысы кезінде болған.
2024 жылдың шілде айында жауапкер өзінің қарамағындағы жұмысшылар Н. және К.-ға тәжірибелі маманның қадағалауынсыз құрылыс-монтаж жұмыстарын жүргізуді тапсырған. Олар техникалық жағдайы тексерілмеген “HPLift 15T” маркалы телескопиялық тіркеме көтергішті пайдаланған.
"Салдарынан Н. және К. жерден 10-11 метр биіктікте орналасқан көтергіш платформасынан құлаған. Олар алған дене жарақаттарынан көз жұмды", – делінген сот хабарламасында.
Сотталушы өз кінәсін толық мойындап, жасаған қылмысына өкінетінін жеткізген. Ал жәбірленуші тарап сотталушыны бас бостандығынан айырмауды сұрады.
Сот сотталушыны 3 жыл мерзімге сәулет, қала құрылысы және құрылыс саласындағы қызметпен айналысу құқығынан айыра отырып, төрт жылға шартты түрде бас бостандығынан айырды.