Жастар арасындағы халықаралық «Адрия інжуі» турнирі Черногорияның Будва қаласында өтіп жатыр. Жартылай финалда еліміздің атынан тоғыз боксшы сынға түскен. Оның 8-і жарысты жалғастыруға мүмкіндік алды. Біреуі қола жүлде иеленді. Бұл туралы Қазақстан бокс федерациясы хабарлады.
Олардың мәліметінше, Рахмина Абдумежитова (52 келі) Түркия боксшысын 5:0 есебімен жеңді. Енді ол финалда Ресей өкілімен кездеседі. Ал 57 келіде Ақнұр Тұрсынғали ресейлік қарсыласын 3:2, Регина Тибенява беларусьтік боксшыны 4:0 есебімен тізе бүктірді. Енді финалда қос қазақстандық бағын сынайды.
Ел құрамасынан Алина Құдайгенова (63 келі) түрік қызын 5:0 есебімен жеңіп, енді финалда Ресей боксшысымен жекпе-жекке шығады. Сондай-ақ 66 келіде финалда тағы да қазақстандық екі боксшы шеберлік байқасады. Бұл салмақта Айсұлу Мұхит ресейлік қарсыласын 3:2, Ақбота Есімбекова әзербайжандық спортшыны 5:0 есебімен қапы қалдырды.
Ал Мария Сидоренко (70 келі) ресейлік қарсыласын мерзімінен бұрын жеңіп, енді ақтық жекпе-жекті түркиялық боксшыға қарсы өткізеді. Тағы бір спортшы Сабина Жақсылық (81 келі жоғары) әзербайжандық қарсыласымен жекпе-жекті алғашқы раундта аяқтады. Енді ол финалда түркиялық спортшымен кездеседі. Толғанай Қасымхан (60 келі) ресейлік қарсыласына жол беріп, турнирдің қола жүлдегері атанды.