Сонымен қатар аймақтарда ең ірі жұмыс беруші ретінде танымал. Өңірлер мен моноқалалардағы түлектердің 50%-ы ERG-ді әлеуетті жұмыс беруші деп біледі. Ал студенттердің 85%-ы оны жоғары жалақы үшін таңдаса, 52%-ын мансаптық өсу мүмкіндігі қызықтырады.
Сапалы кадр – өнімді еңбек
ERG компаниясы өндірісте IT индустрияны дамыту және инновация мәдениетін қалыптастыру, жас мамандардың кәсіби шығармашылық әлеуетін жетілдіру секілді стратегиялық міндеттеме үдесінен шығу мақсатында колледждермен бірлесе Альянс құрды. Қазір колледждер мен ERG Альянсына 23 колледж бен 3 жоғары оқу орны қосылған. Альянстағы 2 коллежде ERG құзырет орталығы ашылды. Бұл құзырет орталықтары – металлургия және тау-кен өндірісіндегі кәсіби білім беру тәсілін өзгертетін жаңа алаң. Мұндағы инновациялы нысандар теория мен тәжірибені қабыстыра ең соңғы үлгідегі цифрлық технологиялармен жұмыс істеудегі тың серпін десек болады. Мәселен, жақында Хромтау тау-кен жоғары колледжінде ашылған заманауи құзырет орталығы VR-зертханасында және тау-кен машиналары мен кешендерінің зертханасында сегіз мамандық бойынша кадр дайындайды.
Заманауи технологиялардың арқасында студенттер шахталар мен өндірістік алаңдардағы жұмысты модельдей отырып, виртуалды шындықта кәсіби тапсырмаларды орындай алады. Кеңауқымды бағдарламалық тізімі бар VR-көзілдіріктері студенттерге оқу аудиториясынан шықпай-ақ түрлі өндірістік процестерге енуге және кәсіби дағдыларды меңгеруге ықпал етеді.
Компания тек 2024 жылдың өзінде колледждерді жабдықтауға 600 млн теңгеден астам қаражат жұмсаса, одан бөлек студенттерге Қытай мен Германияда тағылымдамадан өтуге мүмкіндік берді. Сонымен қатар былтыр колледждердің 737 түлегін жұмысқа орналастырып, жас мамандарды қолдау бағытында рекорд жасады.
Жасанды интеллекті мүмкіндіктері
Компания жұмыс орындарында цифрлық трансформация жүргізіп, жаңа кәсіптерді барынша қарқынды дамытуды қолға алды. Жасанды интеллект технологиялары саласындағы отандық және халықаралық білім беру бағдарламаларын кадрлық әлеуетті арттыруға пайдалануда да біршама жетістікке жетті. Компания елімізде алғашқылардың бірі болып digital бағытты дамыту үрдісін қалыптастырды.
2023 жылы ERG бизнесті трансформациялау бағдарламасы аясында орнықты дамудың негізгі 5 бағыты бойынша ауқымды қайта құруды бастап, ERG корпоративтік университетін құрды. Бұл еңбек нарығында қауіпсіз еңбек жағдайын жасап, қарапайым жүргізушілер, ұңғылаушылар, кеншілер тау-кен техникаларының операторлары секілді жаңа мамандар дайындауға және Топ кәсіпорындарындағы 200 процесс пен 50-ге жуық мамандықты цифрландыруға мүмкіндік берді.
2023 жылдың тамыз айында «Шығыс» кенішінде Қазақстанда тұңғыш жүргізушісіз ауыр жүк көліктері іске қосылды. Оларды басқаруға арналған жаңа мамандық – автономды самосвал операторы енгізілді.
https://www.youtube.com/watch?v=zW9V-5exOBI
Мәселен, 2008 жылы компанияға қарапайым дәнекерлеуші болып жұмысқа орналасқан Дархан Ишанқұлов 2022 жылы қайта оқып, жаңаша білім алып, жаңа мамандық – «ауыр жүк көлігінің жүргізушісі» мамандығын меңгеріп алған.
– 2022 жылға дейін дәнекерлеуші болып жұмыс істеп, кейін өзімді жаңа бағытта сынап көргім келді. Компаниямыздағы қайта даярлау бағдарламасының арқасында жаңа мамандықты игердім. Ауыр техниканың жүргізушісі болып 2023 жылдың соңына дейін жұмыс істедім. Көп ұзамай компания робототехниканың жаңа жобасына үміткерлерді іздей бастады, мен одан әрі өсуді шештім. Байқаудан өтіп, ұшқышсыз автосамосвалдардың операторы мамандығын алдым. Қазір жұмысымызда тамаша нәтиже көрсетіп жатырмыз, – дейді ол.
Қазір Дархан Ишанқұлов 3 самосвалды басқарып отырса, болашақта бірден 10 көлікті басқаратын мүмкіндігі бар.
– Роботтандырылған техника кешенін бар болғаны екі маман басқарады. Жүргізуші-оператор үш машинаның қозғалыс жылдамдығы мен бағытын қадағалап, қауіпсіз маневрлерді қамтамасыз етеді. Ал сервис инженері техниканың жұмысын бақылап, маршруттарды түзеп, жүк тиеу және түсіру алаңдарын жаңартып отырады. Жүргізушісіз жүк көліктері тиеу-түсіру алаңдары арасында тау-кен массасын үздіксіз тасымалдауда. Бұл шешім өндірістегі тиімділікті арттырып, адам факторын азайту арқылы қауіпсіздікті қамтамасыз етеді, – деді ERG Қазақстандағы бас директоры Серік Шахажанов.
Басшының айтуынша, жасанды интеллект негізінде басқарылатын ауыр жүк көліктері қазірдің өзінде 2 миллион тоннадан астам жүк тасымалдап, 17 мың рейс орындаған, бұл – 68 мың шақырым жол. Бұл жоба аясында 2027 жылға дейін шикізат көлемін 115 миллион тоннаға дейін ұлғайту жоспарланып отыр.
ERG-дің негізгі цифрлық жобалары қатарында Qollab және MES жүйелерін атуға болады. MES – өндірісті басқарудың интеллектуалды жүйесі. Ол өндіріс процестерін нақты уақыт режимінде қадағалап, жедел шешім қабылдауға мүмкіндік береді. Жүйенің негізгі элементтерінің бірі – MES Alina виртуалды көмекшісі. Ол қызметкерлерге қажетті ақпаратты тез тауып, есептер түзуге септеседі. Ал Qollab – ERG-дің бірыңғай корпоративтік платформасы. Онда қызметкерлерге арналған әлеуметтік желі, жұмыс процестерін басқару құралдары мен жеке кабинеттер біріктірілген. Бүгінде платформаны 60 мыңнан астам қызметкер тұрақты қолданады және бұл жүйе серіктестер мен мердігерлер үшін де қолжетімді.
Eurasian Resources Group жұмысын бастағаннан бергі 30 жыл тарихында бұрынғы өндірістерді дамыту мен жаңа өндірістерді ашуға $14,6 млрд-тан астам қаржы бағыттай отырып, әлеуметтік инвестициялар көлемін $1,1 млрд-қа дейін арттырды.
Тілекгүл ЕСДӘУЛЕТ